State dang atangin ASF a lut Vawk vulhtute thinrim tawh
Tunhnaiah thenawm state atanga vawk/ vawk note lakluhah African Swine Fever kai an lut ni ngeia ngaih a ni a. Hei vang hian vawk natna kai leh thih pui an awm leh mek. Tualchhunga vawk vulhtu pawl chu hetianga vawk lakluh leh thin hian a ti thinrim hle tawh a, sawrkarin lakluh phal loh a ti chunga lalut an awm chuan na taka hma lak an tum tih an sawi.The Aizawl Post thudawn danin, African Swine Fever (ASF) leng hi Mizoramah chuan thlasik lai khan a ziaawm viau a, hetihlai hian state thenawmah erawh khatih hunlai pawh khan ASF hi a leng tho tih sawi a ni. Kumin chhoah state dang atanga vawk lakluh chungchangah pawh tlemin sawrkarin khuahkhirhna siam tho siin a inthlahdul deuh a, vawk lakluh zingah ASF kai an awm ngei nia ngaih theihin, lakluh zingah hri kai leh thihpui an awm leh tan mek tih sawi a ni bawk.
Kumin February 12 khan Kolasib district magistrate chuan District AH & Vety office atanga a thu hmuh angin, ASF lengin ziaawm lam a pan tak avangin vawk, ASF negative certificate (RAgT/ RT-PCR) nei te chu state/ district pawn atanga lakluh phalna a tichhuak a. Hemi thla vek, February 25 khan he phalna pek hi sut leh a ni tih a puang zui a ni.
All Mizoram Vawk Vulh Association (AMVVA) chuan thuchhuah siamin, Mizoramah ASF a leng Ieh tan a, state pawna vawk lakluh atanga ASF hi darh ni ngeia rin a ni, tiin, hri hi a pun darh zel lohnan April 1 atanga thu leh awm hma chu state pawn atanga vawk lakluh loh nise an duh tih a sawi.
‘ASF hi a darh zel lohna turin state pawn atangin vawk engmah lakluh phal a ni lo. AMVVA chuan he thuchhuah bawhzui hian thu zawm lo apiang chungah a tul angin na takin hma a la ang,’ a ti.
Tunhnaiah Serchhipah ASF hi hmuh a ni a, AH&Vety department-in an chhinchhiah danin, he hri vang hian kuminah Serchhip bikah hian ASF vangin vawk 126 a thi tawh a, he hri kai ngei nia hriat vanga tih hlum (cull) 32 an awm tawh bawk. February khan Durtlang/ Leitan chhehvelah ASF vangin vawk 7 thi bawkin, kumin chhungin ASF vanga vawk thi hi 133 an awm tawh a, cull 32 nen a vaiin, he hri vanga vawk thi/ tihhlum chu 165 an ni tawh a ni.
Kum 2021-a Mizorama hmelhriat tan ASF hi kumtin a la leng a, kum liamta – 2025 khan vawk 9711 a thih bakah vawk 3620 tihhlum (cull) a ni. Department-in vawk thi record an neih hnuhnung ber chu december 10 a ni a; a thawm a reh vang vang hnu ah kumin – 2026 a he hri avanga vawk thi hriat hmasak ber chu January 16 a ni. A darh zui lo nia hriat a nih laiin, Durtlang chhehvel leh Serchhip lamah thihpui an awm leh ta a ni.