Healthy Lunglei App tih lar dan ruahman

Lunglei bawrhsap pisa, Health & Family Welfare leh I&PR official-te leh YMA Sub-Hqrs Lunglei hruaitute chu bawrhsap Navneet Mann hoin Nilaini khan an thukhawm a. Lunglei district mipuiin hriselna tha zawk an neih theihna atana ‘Healthy Lunglei District Campaign’ hnuaia hmalakna leh mahni awmhmun atanga awlsam taka inentirna appointment lak theihna leh online-a damdawi chah theihna tlangzarh tak – LushAI Healthy Lunglei (LHL) App mipuiin tangkai zawka an hman theihnana tihlar beihpui thlak dan tur an sawi.
Healthy Lunglei App chungchanga Information, Education and Communication (IEC) campaign hi May atanga kalpui tum niin, ni 40 kalpui tum a ni. Campaign chhung hian YMA branch hrang hrang leh college-ah hriselna dinhmun endik, hriselna leh LHL App chungchang inzirtir leh intihsiak buatsaih a ni anga, ni 40 chhunga campaign zawhah app download tam leh hmang thate hnenah lawmman siam a ni ang.
LushAI Healthy Lunglei app hmang hian district chhunga sawrkar damdawi in leh health centre-a doctor-te thut hun tur a en theih bakah OPD-a inentir turin appointment a lak lawk (book) theih a. ABHA-a inziahluhna, he app-a inziaklut damdawi dawr atanga damdawi chah theihna awmin, hriselna lama hriat tur pawimawh hrang hrang awlsam takin a hmuh theih. OPD appointment laknaa pui thei tur leh zawhna hrang hrang Mizo tawnga chhang thei tur AI chatbot dah tel a ni bawk.