Thawmhnaw dum-Isua thihnaa kan thih ve chianzia entirna?

K. Hmingthankaia

‘Rinna chu thil tihah a ni lo’ tih leh, ‘Rinna chu thil tih tel lo chuan thi a ni’ tih awmzia vawiin thlenga la hre hrang lo Mizo kristian tam zawkte hi kan la niin a lang. Engkim kan tih leh kan sawi apiangte, kan awm dan apiangte, kan ngaihtuah dan apiangte hi Thinlung duhtu Pathian, engkim hmu veka hre vektu kan Pathian hian min hmu reng si a, ka awm dan leh ka thinlung a hmu vek si a, hetia ka tih hian, hetia ka sawi hian, hetia ka ngaihtuah hian min lo hmu rengtu Pathian chu a lawm ang em? A lungawi ang em? Ka ngaihtuah dan hi a dik loh leh ka tih dan hi a dik loh chuan, ka sawi dan a dik loh chuan, min lo hmu rengtu Pathian lakah a zahthlak dawn lutuk sia, tia, Pathian trihna leh hlauhna avanga, Pathian aw ngaichang chung zel leh Pathian hre reng chung zela engkim ti thintute thil tih hi a ni Pathianin a duh zawng, ‘Thil tih’ a tih chu ni. Engkim kan tih hi Pathian duh zawng a ni em? ti thintute thil tih hi a ni Pathian duh zawng thil tih chu. Chu’ng mite thinlung chu an thil tih leh an hmel leh an nunah a lo lang chhuak thin a, Pathianin a chawimawi a, an zahawm bik thin a ni.
Hetia ka tih hian ka lan mawi phah ang em? Heti hian ti ila ka tih that hmel ang em? Ka lan ropui phah dawn em? Mite tih dan a ni si a, tih ve loh chu a zahthlak, ka lan fel hmel ang em, miten Pathian thu awih hmel takin min hmu se, hetia kan tih hian kan changkan hmel ang em? Kan kohhran a changkan hmelin a ropui hmel ang em? tih kual vel avanga khawvel tak leh mihring taka engkim sawngbawl leh kan tih vel thin hi a ni Pathianin, ‘Rinna tel lo thil tih thi’ a tih chu. Chuti ang vela thil tih reng reng chu a nung lova, mite thinlungah awmzia a nei thei ngai lova, mite thinlungah hna a thawk tak tak ngai lo a ni. “Mi tu pawh a thil tiha thiamloh inchantir lo chu a eng a thawl e. Nimahsela, eng pawh rinna tel lova thil tih chu sual a ni” a tih kha.
Isua krawsa an khenbeh ni Good Friday nia thawmhnaw dum kan han inbel dum thup mai thinte hi mahni theuh kan inngaihtuah chiang ngam em le? Ka ngaihtuahna, ka duh zawng, ka thil tih dan zawng zawng leh ka awm dan zawng zawngte hi Isua duh dan chauh a nih zel avangin, Isua rualin ka thi ve a, ka khawvel lam thil zawng zawng chu krawsah khen behin a awm ve a, phum bo a ni ta, kan tih vanga inha dum nalh em em kan ni em? Nge ni, eng mah ni lo mah ila, Isua thihna kha ka tawrhpui em a, ka sunzia tihlan nan thawmhnaw dum nalh thei ang ber ka ha mai a ni, kan ti zawk em ni? A nih leh, chuti kauva Isua thihna kan tawrhpui si chuan, Isua thute, a zirtirna leh Isua rilru chu kan zawmin kan nunpui thin si em le? “A tawrhna kan tawmpui takzet a nih si chuan, a thihnaah kan thi ve tur a ni” tih thu Bible ami te kha chu ka tan ni lo, midang tan alawm, kan ti leh thung dawn em ni?
Lungleia kan va awm lai khan Good Friday niin mite chuan thawmhnaw dum nalh tak tak hlir Biak inah an rawn ha thin a. Kei erawh chuan ka khawvel rilru hi Isua thihnaah hian ka thihpui ve vek loh lutuk avang leh, Isua thihna tawrhpui lutuk tak anga lan leh, Isua thihnaa thi ve ta niawm taka lan ve kha ka ngam thin loh avangin, Good Friday niin Biak inah chuan kawr var thei ang ber ka ha thin. Mi an thut dum fur laiin ka lo thu var ve va va thin a ni. Beram bo lo 99 zinga Beram bo 1 awmchhun ka an viau loh leh, misual 99 zinga mifel 1 awmchhun pawh ka ang maithei bawk.
Eng pawh ni se, kan chhung lama Pathian hnathawh dan theuh azir zel leh Thlarau Thianghlim aw kan dawn dan theuh azir zel a nih avangin, tu mah hi pawn lam atanga lo indem ngawt leh lo inteh ngawt theih a ni lova. Keimahni theuh erawhchu kan chhung lam kan inteh reng thin tur zawk a ni e. Chubakah, Good Friday nia thawmhnaw dum lo inbel ngawr ngawr pawh chu sual a ni em em hran lo maithei bawk.Tin, Good Friday dawn avanga tuten emaw thawmhnaw dum thar nalh tak an neih phah te, Good Friday dawn avanga Dawrkaite lo inhralh theih phah te pawh kha a tha ve tho maithei bawk. Mahse, sawi leh sawi hnu, kan tih chhan kha a pawimawh ber lai chu a ni a. Engkim mai hi chhung lam takna nei lo, pawn lam lan dan ringawt, a lem leh a der, dawt hi ni lo se a tha vek a ni mai.
Pathianthu awih, Pathianmi, Pathian thraua khat thlaraumi, Pathian nena lengdun, midangte tana malsawmna nih kan duh chuan, Pathian tihna leh zahna avang chauh zelin engkim hi dik tak leh rinawm takin ti zel ila, dik takin nung tlat zel mai ila, Isua rilru leh Isua zirtirnate zawma, englai pawha nunpui mai hi a tawk a ni. Intih tunlaina leh intih changkan leh intih roupinaah hian Pathian thu tak laimu leh thlarauthianghlim a tel lo.
‘Engkim hriatfiahna leh tih dikna leh famkimna chu—Dik taka pianthara eng lai pawha Isua rilru leh Isua zirtirna nunpui hi a ni e’ tih hi ka thuvawn, ka thu rolum ka philosophy kumkhua chu a ni e.