SIMNA NGAIHTHAH SUH
Rev Dr Ramengliana
Mi thenkhat hian thlarau bo an vei luatah thil pawimawh lutuk thenkhat hi an palzut mah mah thin a ni awm e. Chhandamna chang tura kan induhsak luatah Chanchin |hain min phutte ngaihthah chin neih a awl viau ni tur a ni. Hei hi Mizo Kristian tam takin kan tihsual niin ka hre ve thin a. Kan thusawiin mite a hip lovang tih hlauvin ‘simna’ peh hel a awl. |henkhat phei chuan an sawi bo titih thei a ni awm e. Kan Lalpa Isua tih duh dan ni miah lo niin a lang. Han en chik lehzual ila.
1. Khaw pali khaikhin atanga lo lang
“Nang, Korazin, i chung a pik e; nang, Bethsaida, i chung a pik e; in zînga thil mak tihte kha Tura leh Sidona tih ni se, saiip sina vut inphulin an sim tih an tilang daih tawh ang. Mathaia 11:21
Korazin khua hi Galilee dil hmar lama awm a ni a, Bibleah a lang tam lem lo hle. He khuaa Isua thiltih mak chiah pawh ziah lan a ni lo a ni awm e. Chuti chung chuan thil mak tak tak a ti tam hle ni ngei ni tur a ni. Bethsaida erawh hi chu Isua zirtir Petera, Andria leh Philipa te khua a ni a. Isua pawh hian tlawh fovin thilmak a tih thenkhat pawh Thuthlung Tharah hian ziah lan a ni nghe nghe.
Heng khaw pahnihte hian Isua rawngbawlna kha do teh chiam lo mah se, Isua duh ang tawkin an ring tlur duh lem lo a ni ngei ang. Thilmak vanga rin tur chu ni se thilmak chu an hmu hnem tawk a ni. An thinlung erawh kharkhipin a awm a, Isua lamah an hawng duh meuh lo. Sim duh dawn se chuan sim duhna khawp pawh Pathian hnathawh chu an hmu reng a ni. Isua pawhin ‘em em a’ a ti ni ber tur a ni.
Tura leh Sidon te hi Jentail khua, Thuthlung Hlui zawlneiten an sawisel nasat em em te an ni a. Tuipui kam khawpui lian ni mah se Isaia, Jeremia leh Ezekiela ten an chan a la chhiat turzia an puang thin. Isuan hei hi a hre reng ni ngei tur a ni. Khati khawpa khawpui anchhedawngah te pawh khan Isua thilmak tih zozai kha tih ni sela chuan an sim sung sung zawk ang a; simna entir nan saiip sinin vaivul an inphul chiam chiam tawh ang, a ti a nih hi. Sual simna hi thilmak danglam tak tak hmuh tamin a thlen kher lem lo tih a chiang ngawt mai.
2. Khaw chapo atanga zir theih
“Nang pawh, Kapernaum, vân thlenga chawi sân i ni dâwn em ni? Mitthi khaw thlenga nam thlâk asin i nih dâwn? Nangmaha thil mak tihte kha Sodom khuaa tih ni sela chu tûn thlengin a la awm reng tûr. Nimahsela, ka hrilh a che u; rorêl ni-ah chuan in tuar tûr ai chuan Sodom khaw tuar tûr chu a ziaawm zâwk ang,” a ti a. Mathaia 11:23, 24_
Korazin, Bethsaida leh Kapernaum te hi khaw inhlat lutuk lo an ni a. Langa kalna phak chauh an ni. Heti a nih avang hian Isua hian a bei kawp deuh hlawm pawh a ni mai thei. Kapernaum phei hi chu a lar hle a, Isua leh a zirtirte hmun pui a ni ber a ni. He hmuna kan Lalpa rawngbawlnaah pawh hian thilmak leh zirtirna a tam viau a ni.
He khuaa thil an tih tam ang huin Isua an buaipui nasa lo thung a. Sangha manna hmunpui a nih a, ei leh bara an dinhmun a that hlawm thawkhat avangin an thlarau nun a ngawng deuh a ni mai thei. Aigupta atanga Damaska khua kalkawngin a pal tlang avangin sumdawnna hmun tha a ni tel ve tlat bawk. He khuaah hian chhiah lakna office te pawh an lai chhuak nual an ti. Jerusalem te anga khawpui lian tak ni lem lo mah se induh tawkna deuh an nei ve a niang e.
He Isua chen tamna khua hi sualna avanga tuar rapthlak ber khua Sodom tawrh ai pawha tuar nasa tura han insawi khum ta chu Judapa rilruah chuan thil duhawm lo ber a ni ngei ang. Chu chiah chu Isuan chiang taka sawi kha a ni si a. Pathian hnaih tura hun remchang tha kan neih ang zela ro min relsak dawn a nih chuan Zofate hi kan inngaihtuah chian a ngai dawn mang e. Rorelna niah chuan chhuanlam tur kan nei miah lo vang mawle.
3. Krista hmu thei mit
“Aw, ka Pa, lei leh van Lalpa, nangin mi fing leh mi thiamte lakah heng thu hi i thup a, mi mawlte hnena i puan avangin ka fak a che.” Mathaia 11:25
Kan Lalpa Isuan ‘…heng thu…’ a tih hi simna thu leh rorelna thu kha a ni a, he khawvel ngaiha mi fingten an hre thiam vek kher lo a, khawvelin a pek finna atang chuan hriat thiam har tak a ni zawk dan a awm bawk. Thluak tha ngaihtuahna hmanga han ngaihtuah chhuah chi a nih loh avangin Pathian khawngaihna hnathawh a ngai a. Chu khawngaihna chu mi mawl zawk leh tluangtlam zawkten an chang duh viau zawk a ni. Hei hi khawvel dan leh thlarau dan danglamna mak tak a ni nghal bawk a. Mi te berten khawngaihna an chang a, mi lian leh ropui tam takin an hmuh hmaih hlauh thung thin a ni.
Lal Isua sawi danah hian Pathianin mi fing leh mi thiamte lakah thup a, mi mawlte hnena puang angin a sawi a, chumi avang chuan Pathian a fak nghal bawk a. Hei hi a awmzia hriat a pawimawh hle. Isua hian ‘Mi lian leh mi fingte tan hawn a ni ve lo’ ti zawngin a thluk hauh lovang; ‘Mi mawl leh mitete chu chhandam an ni sa,’ a tihna pawh a ni bawk lovang. A Chanchin Tha dawngsawngtute zia a en a, mahni induhtawkna ngahtuten Chanchin Tha an pawh hleithei lo a, khawvel thila chhuan tur nei lo zawkte chuan simna leh rinnain an pawmchilh zel mai zawk a ni. Chu dinhmun chu a hmuhin a Pa hnenah lawmthu a sawi ta a ni.
Hei hi Chanchin Tha nihphung a la ni reng, a ni reng bawk ang. Chanchin Tha chu rilrua inngaitlawm te, mahni induh tawkna nei lem lo te, chhuan tur nei loten an hmu fiah ber thin a. A hlutna leh a ropuina an pawh pha thin. Chu chu Pathian khawngaihna mak a ni. Mahni lam inhmuh len lutuk hian Krista lam hmuhna tur mit neih a har a ni ang e.
“A proud man is always looking down on things and people; and, of course, as long as you are looking down, you cannot see something that is above you.”
C. S. Lewis