Khelmualah Isua hmangaih thu

Tun Chawlhni mai kha a ni, Easter Sunday kha – LZ-a’n Isua hmangaihna thu a puan ni kha.
Biak in a ni lo a, Pulpit tlang a ni lo, inkhawmna hmun a ni lo hrim hrim – khelmualah zawk a ni chu thu chu a puan ni.
Mumbai khawpuiah Mumbai City FC leh Odisha FC te’n ISL match an khel a, mipui an thahnem fu mai. Minute 73-ah Mumbai City captain Lallianzuala Chhangte-in a pet goal a, si khat faiin mual neitu club an chak. Chumi tum, a goal a lawm tum chuan alawm Isua hmangaih thu chu a puan.
LZ-a hian a kut khing lehlam lehlam a tiche a, zaizirin thil a sawi. A thil sawi chu ‘Isuan a hmangaih che’ tih a ni. Zaizira inbiakna, ‘sign language’ an tih hmangin Isua hmangaih thu a puang a ni.
Mizorama a rawn haw hnuhnun berin Ramhlun North-ah kohhranin beng hriatna lama harsatna tawkte leh tawng lama harsatna tawkte an inkhawmpuinaah LZ-a hi a tel a, chumi tuma tawngtheilo tlangval pakhatin a lo ngenna chhangin LZ-a hian khatiang khan a goal thun a lawm a ni.
“Khami tum, kan inkhawm kha, ka rilru an hneh lutuk a. An harsatna leh an dinhmun kan lo hriatpui pha lo hle mai tih te ka ngaihtuah a. Banah khan tlangval pakhatin min ngen ta a,” LZ-a chuan a ti a, chu tlangval chuan sign language hmanga ‘Isuan a hmangaih che’ tih sawi dan a zirtir tih a sawi.
‘Tlangval pakhat hian sign language hmanga ‘Isuan a hmangaih che’ tih sawi dan min zirtir a, goal ka thun huna ti turin min ngen a. Ka rilru a hneh em em mai a, mahse kan han chhuk a, ka lo theihnghilh leh hman a. Odisha nena kan inkhelh tum khan ka hrechhuak a, phur em emin tiang khan goal ka lawm ta a ni,” tiin a goal thun a lawm chungchang hi a sawi.
“Tih tak zetin ka ti a, ka goal thun ka lawm (celebrate) tawhah ka la hlimpui ber ang. Easter Sunday a lo ni kher bawk nen, Easter Sunday-ah tak khatianga Isua hmangaihna thu ka sawi thei kha ka lawm em em a ni. Mahse tihdik chiah loh ka lo nei a, a tawpah khan kut kha kuangkuah tur a lo ni a, chu chu a hnuah ka hre leh chauh a,” tiin a sawi zawm a ni.
A teammate-te’n a awmzia an zawt zui a, a teammate-te hian a awmzia hre lo mah se Kristiante thuchah a nih chu an lo ring sa!
LZ-a hian Bible thu leh Kristiante thuchah hmangin a goal thu a lawm fo a, Bible chang te pawh a kawrah ziakin a pholang thin. ISL a khelh tirh lam, kum lamah pawh a la naupan viau lai pawhin sakhuana lam hawi tihlan loh tur an ti chungin jersey hnuaia a kawr hakah Bible chang, “I thinlung zawng zawngin LALPA ring la, Nangma hriatnaah innghat suh,” (Thufingte 3:5) tih ziakin a goal thun lawm nan a lo pholang tawh. “Khami tum khan, a mak lutuk, min hrem miah lo, club pawh an hrem lo,” a ti.