Serchhip district-ah buha intodelh ber khua – Piler

Serchhip district-ah buha
intodelh ber khua – Piler
Serchhip district loneitute tana District Agriculture Office-in lawmman a siamah a khaw mala anmahni thar buha intodelh ber chu Piler khua a ni.
Agricultural Technology Management Agency (ATMA) Serchhip bultumin ni hnih awh tur ‘Kisan Mela & Exhibition – 2026’ chu Ningani khan Serchhip-ah hawn a ni.
Kisan Mela-ah hian department 8 – Agriculture, Horticulture, Fisheries, Sericulture, AH & Vety, LRS & WC (Soil), KVK leh ATMA bakah entrepreneur-te tan stall 24 siam a ni a. Hmasawnna thar an neih leh thil siam leh thar chhuah chi hrang hrang pho chhuah niin, a thlawna ran vulh entirna thali/thei hrisel nei tura ‘inentirna’ buatsaih a ni bawk.
Farmer producer company leh MzSRLM hnuaia self help group hrang hrang bakah agri-input dealer-te an tel a, hei hian ATMA thil tum ber, ‘Research- Extension- Farmer’ inthlunzawmna ti chakin, loneitu leh entrepreneur-te tan thiamna thar leh eizawnna kawng thar a hawn belh zel beisei a ni.
A hawngtu bawrhsap Paul L Khuma chuan, loneitute chu tunlai thiamna (modern technology) hmang tangkai deuh deuh tur leh mithiamte rawn nachang hria a, an zirchianna atanga thil tha zawk an sawi chu zawm thin turin a chah a. Agriculture chu mimal leh khawtlang hriselna innghahna bulpui a ni, tiin, loneituten thlai hrisel tak an thar theihnan rilru dik pua an hna thawk thin turin a chah bawk.
DAO Serchhip chuan an district-a loneitu thawk tha leh buh thar tamte hnenah ‘Farmer’s Award’ a hlan a. Khaw intodelh berah Piler khua thlan niin lawmman hlan a ni. Award latute chu: Leilet buh tharah 1-na Chawnsanga, Lungpho (qtl. 34.74); 2-na Lalrotluanga, Khawlailung (qtl. 34.2); 3-na Chawngthanpuia, Thenzawl (qtl.32.4). Tlangram buh tharah 1-na Lalthazuala, Piler (qtl.29.4); 2-na Zoramchhana, (qtl.27.93); 3-na Zopektluanga,Hualtu (qtl.23.1); Buha khaw intodelh ber – Piler.