Peace City atana ram inthleng dan tur ngaihtuah tha leh dawn

District Government Land Authority Serchhip chu an chairman, bawrhsap Paul L Khuma hoin Zirtawpni khan an thukhawm a. Thenzawl Peace City (Greenfield Project) hmalakna kal zela sawrkar ram hman dan tur leh district chhunga hmasawnna hna hrang hrang thawh dan sawiho a ni.
Thenzawl Peace City hmalakna hnuaia, Dilpui area-a AH&Vety department ram acre 140-a zau, ran chaw chinna hmun (fodder plantation) leh hnathawktute hmunhma (residential quarters) chu, UD&PA department-in hmasawnna hna a thawhna atana hman tura ruahman a nih dan sawiho a ni. He hmun hi Neihloh khuaa sawn (relocate) tura rel tawh a nih laiin, AH&Vety department hotute chuan Neihloh hi khawl hmanga huan leh ran enkawlna (mechanized farming) kalpuina atan chuan hmun remchang nia an hriat loh thu sawiin, thuneitu sang zawkte nen ngaihtuah that leh tura rel a ni.
Serchhip-a Women & Child Development office sakna atan P&E Veng-a Soil department ram chu chiang zawka ennawn leh nise tih a ni a. Chutih rualin, Leisang kawia Anganwadi Centre awm mek chu nunau leh naupangte tan a him tawk loh avangin AOC Veng-a Soil department ramah sawn tura ruahman a ni bawk.
Bawrhsap chuan sawrkar ram chu ram leh mipui tana vek a nih avangin uluk leh chak zawka humhalh a ni dawn tih a sawi a. Ramri hung leh chhinchhiahna felfai tak neih a tul, tiin, sawrkar leh vantlang ram nek (encroachment) thinte lakah chak zawka hma lak a nih tur thu a sawi a ni.