Barca hmahruaina chhah belh leh hlek

Zirtawpniah Spanish La Liga table-a pahnihna luahtu Real Madrid-in an mikhual Girona lakah point hnih an hloh then a, Inrinnia khelmual lut Barcelona chuan Catalan club ve bawk Espanyol lakah 4-1 hnehna changin an hmahruiana an sawhnghet leh sauh thung a, Real lakah point kua laiin an sang fal ta!
Spotify Camp Nou chhung la peih fel loha mipui
60,736 pungkhawm hmaah mualneitu team tan Ferran Torres chuan darkar chanve an khelh tlin hmain goal hnih a thun hman a; he goal hnih hi Lamine Yamal-a siamsak ve ve a ni nghe nghe.
Catalan derby-a goal hmahruai hi minute kuana leka Manchester City forward hlui Torres-a tihluh niin, minute 25-ah Yamal thawhrah atangin Espanyol goalkeeper Marko Dmitrovic-a ven goal-ah Torres bawk a thun leh a, half time-ah home team lamin si hnih faiin hma an hruai phawt.
Kum 18 leh ni 272-a upa ni chunga khelmual lut Lamine Yamal khan Barca tana game 100 khel tling thei naupang ber nihna record thar a siam zanah assist vawi hnih siamchhuak phawtin, second half tawp dawnah goal khat a thawh ve leh bawk.
Ball chan harsat Espanyol lam hian second half tir lam minute 56-ah Pol Lozano goal khat thun hmangin an si phurh pakhat zawk sut then bawk mah se tarlan tak ang khan minute 87-ah Yamal chuan Nou Camp club goal phai chhungkhatin, a hnu lawk minute 89-ah bench thawhsana khelmual lut England forward Marcus Rashford chuan chiang lehzuala Barcelona chakna goal a thawh ve leh.
La Liga game kua chauh khelh hmabak awm tawhah Real Madrid talbuai a kal tluang leh mek si a, Hansi Flick-a team Barca tan an title kawl lai humhim turin kawng a insual ruah a; mahse, tualchhung league lamah ngawr ngawr hian Catalan-ho an insawrbing thei bik rih lo a, naktuk, Thawhlehni zan hian Champions League second leg-ah Atletico Madrid an han hmachhawn leh rihte a ngai dawn a, tlang tur chuan si hnih laia an hnufual tawhna bin zak khawpa an chak a ngai dawn lehnghal!
Table laihawl luahtu Espanyol hi La Liga match an khel hnuhnung vawi 14-ah chak nei miah loin draw vawi nga leh tlawm vawi kua an nei a, chuti chungin table-ah 10-na an la luah pha!