Champhai district kawngpui siamthatna tur minister-in en

PWD minister Vanlalhlana chuan Inrinni khan Champhai, Mualkawi, Melbuk leh Zokhawthar inkalpawhna kawng siamthat tur a hmunah a enfiah a, PWD hotuten an tawiawm.
Highway kawnghluiin a paltlang siamthatna tur, one time improvement (OTI) atan hian cheng nuai 985 (sanction a ni a. He hna hian Champhai khawchhung – Kanan Veng atanga New Champhai Zotlang inkar bakah Mualkawi, Melbuk leh Zokhawthar khawchhung kawng a huam dawn a ni. He kawng, a tira km 17.45-a thui hi black top chhah tha tak hmanga siam tur a ni a, tunah tender buaipui mek a ni.
Hei bakah hian Khankawn atanga Zokhawthar inkar, double lane highway awmsa enkawl zui (performance based maintenance contract) thawhna tur nuai 2895 sanction a ni bawk a. He hna atan hian tender chhuah tawh niin, April 30 hian technical bid hawn a ni ang. Hna thawh tur hian kawng chhe lai hnawh phui, road sign leh protection wall siam, kawng tluana blacktop thar (periodic maintenance) a huam a ni.
He hmalaknaah hian kawng siam bakah kum 5 chhung enkawl zui (routine maintenance) hna leh leimin thenfai (emergency works) hna pawh a tel dawn a. Champhai leh Zokhawthar inkar inkalpawhna a ti hmasawn hle tura beisei a ni.
April 10 khan PWD minister hian Vangchhia, Leithum, Dungtlang, Khawbung leh Farkawn khawchhung kawng thawmthat tum chu PWD hotu nen a hmunah an enfiah a. Farkawn khawtlang hruaitute nen an inkawmnaah, sawrkarin sum tam tak sengin hmasawnna hna thawk thin mah se, a hmun ngeia mipuiin neitu rilru pu chunga an thlawp leh an vil ve loh chuan hmasawnna a tlo thei lo tih a sawi a. Khawtlanga hmasawnna rahbi thar kai tur chuan khawtlang hruaitute, tlawmngai pawl leh sawrkar hnathawkte lungrual taka an tanrual a ngai tih a sawi.