Lungleiah Green-Ag Project ruahman

Green-Ag Project Mizoram hnuaia Green Landscape Implementation Unit Lunglei Technical Support Group chu an chairman, bawrhsap Navneet Mann hoin Thawhtanni khan an thukhawm a. Agriculture line department atangin mithiamte kalkhawmin, Green-Ag Project hmalak tawhna leh kum 2026– 2027 atana ruahmanna an thlirho.
Chairman chuan Green-Ag project chu loneituten ram tichereu tam lo zawnga eizawnna ngelnghet an neih theihnana tangkai tak a ni, tiin, a hlawhtlin ngei a beisei thu leh Mizoram hmun dang tan pawha entawn tlaka hma lak a nih a beisei thu a sawi.
Lunglei district-a hmachhawp langsar zual – sustainable agriculture hnuaia vaimim, hmarcha, bekang leh thlasik thlai chin dan tur; project hnuaia vawk leh ar vulhtute tana zirtirna pek dan tur; thing phun leh kangmei chhuak tur ven kawnga hmalakna tur leh protected area chhehvela ramngaw leh nungcha humhalh dan tur sawiho a ni.
Thutkhawmah hian Green Landscape Management Plan hmalakna thlirho niin, Lunglei district-a line department ho nena thawhho dan tur (convergence) chungchang sawi a ni a. Kum 2026– 2027 annual work plan leh budget atana ruahman Rs. 1,33,37,665 chu pawm a ni.
Green-Ag Project hnuaiah hian Lunglei leh Mamit district-ah hectare 8972.1 vela zauah leh khaw 38-ah hma lak mek a ni a. Lunglei district-ah hian Bunghmun RD Block-a khaw 13-ah he project hi kalpui a ni. April 10 khan Mamit district Annual Work Plan & Budget Rs. 1,52,86,305 chu pawm a lo ni tawh bawk.
Green-Ag Project hi Food and Agriculture Organisation leh Global Environment Facility fund hnuaia kalpui niin, a tum ber chu India rama loneituten ngelnghet zawk leh ramngaw tichereu lo zawnga eizawnna tlo leh hmasawnna an neih theihnana hma lak a ni.