Mizoram thar sangha hum tum Phai sangha thianghlim lak tum

Mizorama thar sangha state pawn lama hralhchhuah tam lutuk chu sawrkarin hum a tum a. Phai atanga lakluh sangha pawh mihring hriselna atana him thei ang ber tura lak luh a tum bawk. Hemi atan hian standard operating procedure (SOP) siam a ni dawn.Fisheries secretary Er Lalrothanga hoin sangha thianghlim zawk lakluh leh zawrh chungchang chu Ningani khan an sawiho a. Fisheries departments leh Health department-a Food & Drugs Administration hotute an tel.
Mizoram-in sangha khamkhawp kan la thar chhuak loa, phai atangin engemawzat lakluh a la ngai tih Fisheries secretary hian a sawi a. Fisheries department chhinchhiah danin, kum khatah quintal 11808 vel lakluh a ni, tiin, Mizoram-in sangha a tharchhuah tamna Kolasib leh Mamit district ami chu state dangah a tam zawk hralh chhuah thin a ni a, kan sangha mamawh tam zawk phai atanga lakluh thin a ni thung tih a sawi a ni.
“Mizorama sangha thar hi state chhung ngeia hralh chhuak thei turin a zuartute hma lakpui a ngai a. Kan sangha ei, pawnlam atanga lakluh leh Mizorama thar ngei pawh hi a thianghlim tawk em, tih enfiah a tul. Sangha hi Fisheries department enkawl a a nih lain, hmun dang atanga lakluh leh a thianghlim leh thianghlim loh endikah erawh thuneihna kan nei loa, hemi enfiah dan tur hi standard operating procedure mumal tak siam thuai a tul,” a ti.
Food & Drugs Administration designated officer (Food Safety) Lalrinkimi Pachuau chuan, FDA-in state dang atanga sangha lo lut an lo endik tawh dan a sawi a. Thawktu leh sum indaihlohna avangin regular takin an endik thei thin loh tih a sawi. National Food Safety & Standards Act hnuaiah eitur zuartute bakah a hlawma laluttuten lakluh phalna leh zawrh phalna nei turin an hnen atangin certificate an neih a ngai a, dan an zawm loh chuan hrem theih an ni, tiin, sangha thianghlim leh hrisel zawrh leh hralh a nih theihnan SOP siam ngei tha a tih thu a sawi bawk.
Thutkhawmah hian Mizoram sangha tharte state pawna thawnchhuak loa, mipui hnena lei theiha siam tul tih thu sawi a ni a. A bak mamawh state dang atanga lakluh tur pawh a thianghlim thei ang ber lakluh a nih theihnan hmalak ho dan tur an rel. Food & Drugs Administration lamin SOP duang se, a tul angin Fisheries department-in puibawm se, thawktu leh sum mamawh chu sawrkarah dil mai nise, an ti.
Sangha zuara eizawngte pawh Mizorama tharchhuah ngei sangha a tam thei ang ber an zawrh dan ngaihtuah tura hma lakpui dan zawn a ngai an ti a. State pawnlam atangin sangha thianghlim zawk lakluh a nih theihnan hma lakpui dan zawn dan chu SoP-ah hian dah tel nise an ti a ni.