Israel leh Lebanon-in ni 10 inkahhai rem an ti – Trump

ni 10 chhung inkahhai an remti niin US President Donald Trump-a’n a sawi.
Inkahhai tura inremna hi India huna Zirtawpni zing dar 02:30-ah hman tan a ni dawn tih Trump-a chuan Israeli Prime Minister Benjamin Netanyahu-a leh Lebanese President Joseph Aoun-a a biak hnuah social media-ah a tar lang.
“Hruaitu pahnih hian an ramte inkara REMNA an neih theih nan ni 10 INKAHHAI chu tlai dar 05:00 (US khawchhak hun)-ah tan turin an inrem a ni,” tiin Truth Social-ah a tar lang a ni.
Lebanese Prime Minister Nawaf Salam-a chuan he thu puan hi lawmawm a tih thu X-ah tar langin inkahhai puan hi ‘indo tan atanga Lebanese tam zawkin kan thil duh’ a nih thu a sawi a. Ningania US-a Lebanese leh Israeli thuneitute inbiaknain a tum ber a nih thu a sawi bawk.
Lebanon hi March 2 khan buainaah a lut tan a, Iran nena inzawm ralthuam keng pawl, Hezbollah chuan February 28-a US-Israel tang dunin Iran an beih tan nia Iranian Supreme Leader Ali Khamenei an thah phuba lak nan leh Iran an thlawp lantir nan rocket-in Israel an kap tan a ni.
Israeli sipaiten na takin an chhang let a, Lebanon-ah mi 2,100 chuang an thi hman a, mi sang tam takin hliam an tuar a, Lebanon ram 15% vela chengte chu hmun him pana chhuak turin an ti bawk.
Lebanese health ministry chuan ni hnih kalta chhung khan an ram chhim lama Tire district pum pui beihnaah mi pakua an thi niin a sawi a, damdawi ina thawk pakhat pawh a tel.
Trump-a chuan Netanyahu-a leh Lebanese President Aoun-a chu hmaichhana inbe turin a sawm dawn tih sawiin an pahnih hian an inrem lohna chin fel an duh thu leh ‘a thlen thuai’ a rin thu a sawi.
Vice President JD Vance, Secretary of State Marco Rubio leh Joint Chiefs of Staff Chairman Dan Caine te chu inremna nghet tak siam tura thawk turin a hriattir tih a sawi bawk.
Inkahhai hi chawlhkar khat chhunga palai intira nasa tak beih hnua tihfel a ni.
Thawhlehni khan Lebanese leh Israeli palaite chu Washington-ah an inhmu a, kum tam tak chhunga hmaichhana an inbiak hmasak ber niin Rubio-a’n a mikhual a ni.
Inbiaknaah hian thil lawmawm an sawi nia sawi a ni a; mahse, Aoun-a hian Netanyahu-a nena hmaichhana inbiak a duh lo niin thil hrechiangtu sorkar thuneitu pakhat chuan Associated Press hnenah a sawi a, Washington pawhin ‘Lebanon dinhmun hi a hrethiam’ tih a sawi.
Hetih lai hian US leh Iran inkahhai kalpui mek, US leh Israel-in Lebanon a huam lo nia an sawi chu karleh hian a tawp dawn a, Pakistan-ah inbiak thar leh a beiseiawm mek thung.