ILP dan bawhchhia en uluk tum

Kolasib district-ah inner line permit neih ngaiten dan an bawhchhiat leh bawhchhiat loh en uluk tumin district thuneituten ruahmanna an siam.
Kolasib district chhunga inner line permit (ILP) dan bawhchhiate chungchang ngaihtuah leh hmalak dan tur relin, additional DC B Malsawmtluangi hoin Thawhtanni khan a kaihhnawih sawrkar aiawhte an thukhawm a. ILP nei lo leh ILP hun tiam pel (expire) tawh dap chhuah leh enfiah an nih theihnan police officer -in- charge (OC) ten kar khatah vawikhat tal routine inspection an neih ziah thin tih sawi a ni.
Khauh zawka ILP dan kalpui dan tur leh dan bawhchhiate hrem dan tur sawiho a ni a. ILP hmanga hnathawk leh midang rawn lut lakah hian a latu (sponsors) ten mawhphurhna lian tak an neih thu leh, an mawhphurhna te tha taka hlen chhuak tura beisei an nih thu sawi lan a ni bawk.
ILP endik leh dan kengkawh tur hian khawtlang hruaitu – village council leh YMA nena thawhho a pawimawh tih sawi a ni a. Hemi bawhzui hian May chhung hian sub-divisional level hrang hrang – Kolasib, Kawnpui, Vairengte leh Bairabi ah tlawmngai pawl nen tanghoin joint inspection neih nise an ti.
Thutkhawmah hian SDO (Sadar) H Lalramliana, SDO (Civil) Bairabi Chinlianmanga, SDO (Civil) Vairengte H Vanlalbiakzauva, SDO (Civil) Kawnpui Dr Doris Lalrinawmi, SDC (ILP BO) Lalremsiama Darchhun, DC office Kolasib aiawh, Bairabi Police Station aiawh leh Vairengte Police Station office in charge an tel.