Ruihhlo cheng vbch.465 hu halral

Champhai Police chuan ruihhlo cheng vaibelchhe 465 chuang hu an man chu Thawhlehni khan district bawrhsap Mohammad Aaquib chuan a halral.
Ruihhlo halral tak hi Champhai Police-in hmun hrang hranga an man, District Court-in halral tura phalna a pek tawh an ni a. 2025 March atanga October chhunga man niin, ND&PS Act tlawhchhana thubuai 99 ziahluh an ni.
Heroin kg 35.852 a rit, cheng vaibelchhe 71.704 hu, methamphetamine kg 490.896 a rit, vbch. 392.718 hu leh alprazolam kg 4.740 a rit, nuai 94.8 hu a ni a, a vaiin Rs. 4,65,36,88,000 hu a ni. Police-in ruihhlo an chhutna hi tualchhunga an hralhna thin angin an chhut thin tih an sawi.
Kum 2025 chhung khan Champhai Police hian ND&PS Act tlawhchhanin thubuai 147 an ziaklut a, hemi kaihhnawihah hian mihring 260 man niin an zingah hian ramdang (Myanmar) mi 58 an tel.
Kum 2025 chhung khan heroin kg 38.477, methamphetamine kg 622.4, crystal methamphetamine kg 5.169, caffeine kg 3000, alprazolam kg 4.470 leh corex gram 1.6 an man a. 2026 January 1 atanga April 20 chhung khan ND&PS Act tlawhchhanin thubuai 47 ziaklutin, mihring 76 an man a, an zingah hian ramdang (Myanmar) mi 22 an tel. 2026 January 1 atanga April 20 chhung hian heroin kg 8.266, methamphetamine kg 76.245 leh crystal meth kg 10.259 an man.
Bawrhsap chuan nikumah cheng vaibelchhe 117 chuang hu ruihhlo an halral tawh a, tunah cheng vaibelchhe 465 chuang lai halral a ni leh chu lawmawm a tih thu a sawi a. State Home minister hmalaknaa ‘Operation Jericho’ kalpui a ni chuan kawng tam takah awmzia a nei tih sawiin, hun lokal zelah ruihhlo titlem zel tura chawl loa thawh a tul a, thalaiten ruihhlo an khawih lohna turin nasa zawka zirtir a tul tih a sawi a ni.
Ruihhlo bakah a tawlhruknaa inhmahnawihte man chhuah kawngah tangho zel turin a chah a. Khualzinte hriat tan mek Champhai chu a mawina hmu duha lokalten a ni lo lam an hriat lohna tura ruihhlo do kawngah theihtawp chhuah a tul tih a sawi bawk.