Sawhthing Quintal 59,000 lei tawh

Sawhthing neitute’n an hralh mek a, Mizoram sorkarin a chhinchhiah danin, April ni 20 thlenga sawhthing hralh tawh hi quintal 59,622.379 a ni.Mizoram Agriculture Marketing Board (MAMB)-in an chhinchhiah danin, sawhthing hi 1,71,626 hralh a ni tawh a, chu chu kg 59,66,237.90 niin, a quintal zawng chuan quintal 59,622.379 a ni.
MAMB hotute sawi danin, sawhthing hi a thartute hnen atangin a lei duhtute’n an lei a, kg 1 an leina Rs 50 a tlin lohna kha sorkarin a tum a ni.
A leitute’n sawhthing an leina hi a inang lo thluah a, a lei to berte’n kg-ah Rs 35-ain an lei. Rs 33-a lei te, Rs 32-a lei an awm a, Rs 31-a lei leh Rs 30-a lei an awm bawk. A lei tlawm berin Rs 20-in an lei a, Rs 22-a lei te, Rs 23-a lei te an awm.
Sawhthing hralh tawh zawng zawng hi Rs 15,95,08,184.50 man tiin an chhut a, kg 1 man Rs 50 a tlin lohna hi dawng tawh an awm rualin a tam zawkin an la dawng lo nia hriat a ni. District thenkhat, dawng hnai an awm thu MAMB lam chuan an sawi.
A leitu hi mi hrang hrang an ni a, hnam dang leh tualchhung mi an ni.
MAMB hotute chuan May thla tawp thlenga lei tum a nih thu an sawi a, mahse April pawh hi sawhthing hralh hun a nih tawh loh avangin, a lo cho tawhte’n sawhthing a zang telh telh tih an sawi.
Sawhthing hi February ni 2-a lei tan tum a ni a, mahse February ni 9-ah lei tan a ni. A leitu turte nen a man chungchanga indawr fel hun an nghah avangin February ni 2-a lei tan hman a ni lo tih MAMB hotute chuan an sawi.