AR rama thing kih vangin traffic jam a ziaawm phah ka ring lo

K. Hmingthankaia

He ka thu ziah hi chanchinbu lama chhuah a nih meuh hun chuan ka thusawi tum hi chuan a nih tur lam lam chu a lo ni zo fel vek tawh tho maithei a. Mahse, a pawi lo, thil tih harsa tak leh thleng khat tak, he kan Aizawl khawpui khawlai liantham deuha singsak vel hun laia ka lo awm ve avang leh hmu pha vea ka awm avanga engemaw tal sawi ve theia ka awm hi lawmawm ka ti ve hrim hrim a, vannei pawh ka inti a ni. Tunhmaa kan Aizawl khawpui awm dan leh an lo singsak vel dan kha kan hmu pha ve lovin kan hre pha ve lo ang bawk hian, nakin lawkah chuan tuna AR ram kan singsak vel dan mai bakah, tunlaia Aizawl kawng kual ulh lutuk thenkhat kan siam that vel dan rawn hmu hman ve lo leh a hmaa awm dan rawn mitthla thiam lo ten kan Aizawl khawpui hi an la rawn luah ve leh ngei dawn si a. Chu’ng hoin tuna kan thu ziakte hi an la rawn hmuh hunah engemaw zawng tala ngaihtuahna an neih ve takin tih thuah engemaw mai mai kan sawi ve ange.
Aizawl khawpui laili lai atanga Assam Rifles te Zokhawsanga an insawn avanga an ram chhuahsan kan hman dan tur lam hi chu tam tak sawi nawn hun a ni tawh lova, sawrkarin thutlukna a siam tawh a ni. Amaherawhchu, Bazar Bungkawn atanga Dak inpui thlenga kawng zauh an tum leh, chumi avanga thingkung engemaw zat kih an tum leh an kih nual tawh thu erawh hi chu sawi ve ka duh a ni.
Traffic jam tih ziaawm nana he lai kawng zauh an tumna lai hi Aizawl khawpui tlangdung kawng zau lai deuh ber, traffic jam pawh a nasat lohna lai tak a ni zawk hial maithei. Chuvangin, helaia thingkung tam tak, Aizawl laili leh langsar lai taka awm, Aizawl ti Aizawla, Aizawl ti nuamtu leh Aizawl ti zahawmtu kan paih avang hian Aizawl khawpui traffic jam nasa hi a ziaawm phah chuang dawnin a lang lo a ni.
Chuvangin, helai hi chu khawih che lo mai ila, thingkungte pawh hi tuna a awm ang ang hian awmtir mai bakah, a dang pawh awmze nei takin phun belh zel zawk ila.Tuna an lo kih tawh ho pawh hi uiawm tak a ni. Ka han thlir vela, ka ui hlawm khawp maia, Quarter gaurd hma lam chhimlam sira Lamkhuang kung an lo kih tawh ka hmuh phei chuan eng eng emaw min ngaihtuah chhuahtira, ka lung a ti leng lawk mai ni lovin, ka lung te pawh a ti chhe tel thei deuh zawk hial a ni. Kan naupan lai atanga tuna an kih hma thlenga khi Lamkhuang kung buka zan riah tum chawngzawng leh sava dangte tlai lam atanga an chiar nuai nuai thin lai te, kan naupan laia sava hmuh tuma a hnuaia kan awm thin laite ka ngaihtuah chhuaka, lung a leng duh khawp mai. Kha Lamkhuang bukah khan chhunah pawh sava an awm fo thin.
Chumai bakah thingkung an kih ho ka ui lutuk chuan suangtuahna tha lo lam te kha min neihtir hiala, keini’n chhuang taka kan lo thlir ve thin kha, tute emaw chuan ti tura thu pek an nih avang mai leh hlawh hmuh nan mai khan emaw, tute emaw chuan pawisa hmuh nan mai khan, neitu rilru pu ve hauh lo khan dimlo baksak leh lainatna tel hauh lo khan an kit bawrh bawrh awm si a, ka ti rilru a, a inngaihtuah thinrim theih deuh hial mai alawm maw le. Mahse, suangtuahna vak vel mai mai a ni a, ui tak chunga kit pawh an ni ve tho ang chu.
Chuvangin, Bazar Bungkawn atanga Dak inpui inkar hi chu kawng chep lutuk lo lai ber leh traffic jam pawh a nasat lohna lai tak zawk a nih avang hian, thing kih phahna tur a nih ai chuan tuna a awm ang hian i dah mai ang u hmiang.
Amaherawhchu, Aizawl khawpui tlangdung kawng khawimawlai tlemte tal hi chu thawl nuam ve deuh hekhawk tawite tal chu i siam ve ang u hmiang kan ti a nih erawh chuan, tih zauh nuam leh awlsam ber tur lai chu helai hmun hi a ni ngei si anga. Chutia’nga kan ti dawn a nih pawhin, thingkung kih tlem theih dan tur ber ngaihtuah nise, a eng line thawktu pawhin neitu rilru pu tlat chungin, tunah leh nakin thlenga kan vai atana tha ber tur leh dik leh tha, nuam leh mawi thei tur ang ber zela ngaihtuahna tak tak hman ni rawh se.
A thuhrimah helai kawng tih zauhna tur meter 14 tih kha, kawng awmsa nena teha meter 14 a ni nge, a tih zauhna tur ringawt meter 14 ni zawk le? A tih zauhna tur ringawt a nih chuan a va zau lutuk dawn ve le..Thil hlui thil tha kan va ti chhe hnem dawn awm ve le..
Sawi tawh angin helai kawng hi Aizawl kawngpui rau rauah chuan a zim chhe lo lai a ni bawk a, kan zauh duh a nih pawhin, a remchan dan ang anga tlemte te, a remchanna lai lai chauh zauh ni se, thingkung kit kher lova tihdan zawn zel ni se tih hi ka rawt ve duh a ni. Kei tak phei hi chuan meter 14 a an zauh phei chuan hna an thawk rei dawn si, fur a lo ni dawn bawk nen, kawng an ti berhin an ti hnawk rei dawn si a, Aizawl an ti hrehawm rei dawn mang e, tiin ka lo huphurh lawk em ema, chuvangin zauh loh mai pawh hi kei tak hi chuan pawi ka ti lo a ni deuh ber e.
Aizawl traffic jam nasat chhan hi helai kawng vang hi a ni ber lova, chhan hrang hrang hi a tam lutuk a, sawisen pawh a ni lo. Langsar tak pakhat chu kawngsira motor dah tam lutuk a ni. Tlema kawng thawl ve deuh tur lai apiangah motor dah kan phal zel a. Tlema remchang tur deuh lai apiang chu parking fee khawn nan kan it em em zela, chuti ang tur hmun chu kan melh kan melhin kan zawng ruai ruai reng zel bawk si. Tlema kawng ziaawm tur lai deuh leh mipui tana thawveng ve deuh tur, mimal ram ni chiah lo deuh lai apiang lah chu, rem leh rem lo, leng leh lenglo chung chung pawhin eng pawl pawlin emaw in sak nan leh luah man pawisa tuak nan kan chuh zung zung zel bawk si a. Hei hi Aizawl khawpui tlangdung kawng chauh ni lovin, Aizawl Vengtin vengchhunga kan thil tih duh dan, Aizawl pum pui chep lehzual em emna chhan leh thawpikthlak em emna chhan chu a ni. Heti lam thu hi chu Aizawl traffic jam tih ziaawn dan tur inziahsiakah khan uar deuh takin kum riat vel kaltaah khan ka ziah tawh kha. Mahse, vawiin thlengin kan la sim duh chuang lo.
Aw le, Bazar Bungkawn atanga Dak inpui thleng hi tlem tala Aizawl ti nuam ve deuh atan kan lo zauh a nih pawhin, sawi tawh angin, thing kit tlem thei ang berin, a rem chang lai lai tlem tlema zauh chauh ni se. A thawktu tupawhin neitu rilru dik tak puchungin thawk bawk rawh se.Tin, kan lo zauh ta a nih pawhin thingkung dang awmze nei takin kawng sirah phun nghal zat zat bawk ila. Tin, chhun leh zanah eng motor mah dah phal lo ila, eng pawl mahin sum tuakna tur hmunhma lo siam lo bawk rawh se. Chuti lova motor parkna remchang leh sum siamna atan mai bawk kan hman leh chuan a pawi thui mai mai dawn a ni.
Thil pakhat- Aizawl khawpuiah hian kawng ti cheptu leh mipui veivak tana regular taka harsatna thlen thintu, thil ngaihmawhawm tak takte hi awm teuh mah se, tun atan chuan hmun hnih thum chauh ka’n sawi ange. Pu C. Thangkima building Aizawl Watch House atanga chhimlam, a bik takin Hotel Ritz kawt zawn vela chhun leh zan englai pawha lirthei chi hrang hrang dah rengte, Canteen kual Pu Thanzaua building, Zofa dawr kawt vela lirthei englaipawha dah thinte hian mihring kea kalte tan harsatna an thlen nasa thin hle a ni. Mihring kalna lai turah an dah tlat thin avangin henglai vela motor tlanlai leh dinglai inkar velah chep tak leh hlau chung chungin mihring kan kal thin a ni. Tin, Canteen kual kawng chep tak sira mihring kalna tur an siama englaipawha 2wheeler inhung tlat thinte, abik takin Ankit restaurant zawna regular lutuka dahte, Temple atanga Sairang road tawntirh te, traffic duty post atang pawha lang pha deuh thaw, Tuichhunchhuah thlen hmaa kawngsira motor inhungte avang hian kea kalte tan a hlauhawm thei thin hle a ni. Heng ka sawina lai bawr vela traffic police ka hmuhte hnenah pawh ka lo sawi zauh zauh tawh thin, mahse, a la ngai reng a nih hi.
Aw le, thil engemaw vei han neih hi chuan mahni chhung lamah a hahthlak ve duh thin si a, engemaw tala han sawi chhuah ve te hian a thawventhlak ve deuh huai thin avangin, khiti ang thute khi sawt dawn tak tak lo mah se, hmanhmawh tak leh chhumbung deuh rem rumin chanchinbua lamah ka’n inbun thawl ve leh mai mai a nih hi.