‘Mizoram First’

KMMTTP leh Rel lo lutin min nghawng dan tur zirhona hun ‘State Level Sensitization, Awareness and Consultation on Socio-Cultural and Economic Impacts’ chu nimin khan Aijal Club-ah Study Committee huaihawtin neih a ni a, sawrkar mi pawimawh, mithiam bikte leh NGO hrang hrang aiawhte an fuan khawm a. Hetiang zirhona hun buatsaih a ni hi a lawmawm hle a, nakinah zau zawkin mipuite hriattur pawimawhte pawh puanzar a la ni zel turah ngai ila.
Tunhmaa state mawngping tih thin Mizoram chu chhim leh hmar atangin inkalpawhna kawngpui leh rel kawngin a paltlang dawn ta a. Chhim lamah Kawl ram atangin kawngpui lian a lo lut ang a, hmar lamah Vai ram atangin rel kawngin a paltlang bawk ang a, inkalpawhna kawngpui lian pahnihin Mizoram a verh tlang dawn tihna a ni. Mizoram hi sap chhang hmingthang tak ‘Sandwich’ nen tehkhin a ni thin a. Khawchhak lamah Kawl, khawthlang lamah Vai (Bangladesh). Tuna min luhchilhtu turte hi Kawl leh Vai (India ram Vai) an nih dawn avangin Mizoram hi ‘Kawl-Vai Sandwich’ tiin a hming vuah fiam theih a ni awm e.
Tunhmaa Mizoram awmna (location) sawi nana ‘sandwich’ hman thin kha, tunah chuan a practical-in kan hmang dawn a. Khawchhak lam atangin Kawl sumdawng leh khualzinmite an lo lut hum hum ang a, hmar lam atangin Vai sumdawng leh khualzinmite an lo lut hum hum bawk ang. Tunah hian rel kawng hian Sairang a rawn thleng ta a, hnam dang khualzin an lo lut hum hum a, khawtlang leh hnam nunphung a khawih a, eizawnna kawng thar a inhawng a, kan lifestyle pawh hi a danglam tial tial dawn tih a hriat theih mai awm e. Chhak leh thlang, chhim leh hmar atangin, hnam ze hrang hrangten min rawn pawlhsawp ang a, min rawn chim dawn a ni.
Heng mikhualte hian kan in leh lo min rawn chuhpuiin kan hmunhmate min luahlan kher lo maithei; mahse, kan rilru leh ngaihtuahna, kan sukthlek leh ze nghet kan neihsate erawh an rawn chim nasa dawn tih a lang reng. Chung lo hmachhawn tur chuan ‘ngaihtuahna fim/rilru fim’ kan lo put a pawimawh hmasa ber awm e. Eizawnna leh sumdawnna kawng hrang hrang a inhawng thar ang a; eng pawh tiin thawk ila, ram leh hnam tana pawi thei tur pumpelh thiam tura tun atanga kan lo inzirtir a, kaihhruaina fel tak kan lo ruahman lawk a pawimawh dawn hle. He ram zimte hi khawvel awm chhungin a zau belh tawh kher lovang; kan humhalh that loh chuan, min karchehtu hnam lian tak takte bawihah kan lut palh ang tih a hlauhawm hle a ni. Eng pawh ti ila, Mizoram himna khawih pawi thei tur laka inthiarfihlim thei turin thuvawnah ‘Mizoram First’ tih hi kan vawn tlat a pawimawh dawn a ni.