HSLC exam 2026 80.31% hlawhtling Sawrkar school-in hma an sawn zel

HSLC exam 2026 80.31% hlawhtling
Sawrkar school-in hma an sawn zel
Mizoram Board of School Education (MBSE) chuan April 23 khan High School Leaving Certificate 2026 exam result a tichhuak a, zirlai exam zinga za zela 80.31 an pass. Nikum HSLC result (76.68%) aia kumin result a san zawkna hi 3.63% a ni.
Kumin result-ah hian tunhmaa tarlan thin top ten, division, mark hmuh zat leh letter hmuh dan tarlan a ni ta lo a. Hei hi kumin kumtir lama Education minister Dr Vanlalthlana’n, ‘High School Leaving Certificate (HSLC) leh Higher Secondary School Leaving Certificate (HSSLC) result bu-ah zirlai ti tha zual (top 10) leh zirlai pass-te division leh letter hmuh dan tihlan a ni tawh dawn lo’ tih a lo puanzar lawk tawh tihhlawhtlinna a ni. He kalphung hi CBSE, CISCE leh state tam takin an kalpui tawh tiin education minister hian a sawi a; zirlaite mark hmuh dan kimchang chu MBSE website atangin a la hmuh theih vek dawn a, merit list leh rank certificate diltute hnenah MBSE-in a pe chhuak thei reng ang, tiin a lo sawi tawh a ni.
Kumin result-ah hian sawrkar enkawl sikul hmasawnna a lang leh a. Kum 2024 khan zirlai 63.28% an pass a, 2025-ah 68.01%; kuminah 72.07% an pass. Hei bakah hian, kum danga zirlai exam zawng zawng fail vekna sikul zingah sawrkar enkawl sikul an tel thin a, kuminah erawh an tel ta lo.
Management wise-ah a hma kum aia tlahniam an awm lova, tih that dan indawtah erawh sawrkar sikul a hniam ber thung.
Tih that dan indawtah, deficit school an sang ber a, 96.92% an pass a, nikum (92.62%) aia an sanna hi 4.3% a ni. Private school-in dawtin 89.38% an pass a, a hma kum (85.54%) aiin 3.84% -in an sang zawk. Pathumna chu lumpsum school niin 77.47% an pass a, a hma kum (77.29%) aia an san zawkna hi 0.18% a ni. Palina chu aided school niin 72.66% an pass a, a hma kum (68.37%) aia an san zawkna hi 4.29% a ni. Pangana sawrkar sikul niin 72.07% an pass a, a hma kum (68.01%) aia an san zawkna hi 4.06% a ni.
Kuminah hian zirlai exam pass vekna sikul 146 an awm a, heng zinga 21 chu sawrkar sikul an ni. Zirlai fail vekna sikul hi 13 an awm bawk; sawrkar sikul a tel lo.
Kumin February leh March thla chhunga HSLC exam beitu zirlaite hi an vaiin 18,257 an ni a, pass zat hi 14,663 niin fail hi 3,477 an ni a, compartmental chance nei zirlai 117 an awm a; compartmental examination neih hun tur erawh ruat a la ni lo.
Tun tumah pawh hian National Education Policy 2020 zulzuiin exam pass-te hian an duh ber subject pakhatah exam an bei nawn thei dawn a ni.
Kum 21 chhunga HSLC result %:
Year Pass(%)
2006 40.49
2007 51.46
2008 62.40
2009 60.46
2010 66.60
2011 69.99
2012 72.27
2013 58.63
2014 67.51
2015 68.30
2016 71.17
2017 72.17
2018 76.65
2019 67.93
2020 68.33
2021 82.43
2022 70.64
2023 71.14
2024 73.37
2025 76.68
2026 80.31