UPC-NEI in pasalte chi ngei hmang chauha nau neih duh

Nupa kara tunlai thiamna hmanga nau neih chungchangah nu in an pasalte chi ngei hmang chauha nau an neih theihnan UPC-NEI chuan an kohhranah hma an la dawn.
April 23-26 chhung khan United Pentecostal Church – North East India chuan Aizawlah general conference vawi 58-na an hmang a. Inkhawmpui thupui atan “Isua Krista lo kal lehna’ (Thupuan 22:12) hman a ni.
Thurel zingah, tunlai thiamna hmanga nau neih (modern reproductives technologies) chungchang sawi a ni a. Nau neih dan pangngai anga nei thei lo nupa tan tunlai thiamna an hmanin, pasal chi ngei atanga fa neih tura hma lak nise, an ti. India hmarchhak pumah nasa zawka ruihhlo do nise, an ti bawk.
Kum 2026-28 chhunga UPC-NEI general superintendent atan Rev Zohmingthanzama an thlang nawn a; general secretary-ah Rev. Lalmalsawma Sailo, general treasurer-ah Rev. R Laichhingpuia thlan an ni. Kum 2027 general conference chu Lunglei-in a thleng dawn a ni.
Inkhawmpui report bu-a a lan danin, UPC-NEI hnuaiah hian District 12 leh Mission Field 11 a awm a, kohhran member 123199 an awm.