Kan thalaite an chhe vek bik lo – Richard Vanlalhmangaiha

Mizoramah ruihtheih thil, a bikin ruihhloin thalaite tibuai hle mah se, kan thalaite an chhe vek bik loa, ruihhloa buai lo thalai fel tak tak an tam tih MP Richard Vanlalhmangaiha chuan a sawi.
Member of Parliament Local Area Development (MPLAD) Fund 2024- 2025 atanga cheng nuai 15 senga sak Thingdawl Village Council-II huamchhunga futsal ground thar chu Thawhtanni khan Lok Sabha MP Richard Vanlalhmangaiha hian a hawng a. Hetah hian ruihtheih thilin thalaite a tihbuai nasat zia a sawi.
Mizoramah ruihhlo hmang mek mi 14000 chuang record an awm a. State-a mi cheng zat atanga chhutin ruihhlo hmang hi zaa 6.9 niin, India ram puma ami cheng atanga ruihhlo khawih zat chawhrual aiin a sang daih zawk tih a sawi. Tun dinhmunah de-addiction centre hrang hrangah mi 5000 chuang an awm mek tih a sawi bawk.
Kum 1990 atanga chhutin Mizoramah HIV hrik pai mi 30000 chuang hmuhchhuah an ni tawh a, ruihhlo leh HIV vanga nun chan pawh mi thahnem tak an awm tawh tih MP hian sawiin, “Ruihhlo do kawngah hian mipui tanrual a ngai a. Thalaite ruihhlo laka an boral zel lohnan tan lak a ngai. Chutihrualin, harsatna tam tak karah pawh kan thalaite an chhe vek bik loa, ruihhloa buai lo, thalai fel tak tak an tam a, hengte pawh hi min fuih thartu atan kan hman a ngai a ni,” a ti.
Khawtlang mipui chu sawrkar hmasawnna hnathawh thlawp zel turin a sawm tih a sawi a. Hmasawnna hnathawh hrang hrang kal mek pawh uluk taka lo chik tura chahin, hemi kawngah hian khawtlang tanrual a pawimawh tih a sawi a ni.