Neihloh khua insawn dawn

Serchhip district Neihloh khua sawnna tura master plan chu Nilaini khan chief minister Lalduhoma hoin thlirho a ni.
Neihloh khua hi a khaw puma leilung chetna hmun, khuarel chhiatna avanga him tawk tawh lo a nih avangin an khaw ram chhung hmun danga insuan mai thain a khaw mipui leh sawrkar chuan a hria a. Hma pawh engemaw chen lak a ni tawh. A khaw hmun thar tur an vat fai tawh a, khaw chhung inkalpawhna kawng laih tan a ni a. Mipui nitin mamawh petu sawrkar department-ten engemaw chen hma an la tawh bawk.
Neihloh Village Planning Committee thutkhawmah hian UD&PA Town & Country Planning-in master plan an sawifiah a. Survey vawi nga an neih hnua an siam niin, khaw thar hi hectare 60 biala zau tura duan, plot 105 nei, plot tin hi square meter 800 aia zau vek an ni. Plot pakhat chhungah in pakhat bak sak phal loh nise, in hi sak belh dawn chuan plot tharah zel dah nise an ti a. A khua hi tihzauh zel theih tura duan a ni.
Master plan-ah hian vantlang hmunhma pawimawh – community hall, school, VC House, biak in, tanky leh ruahtui khawlna hmun tur, bawlhhlawh sawngbawlna hmun, transformer dahna tur, parking area leh green area tur fel taka duan a ni a. In sak dan tur ruahman (minimum standard) pawh a keng tel.
Master plan hi thenkhat an siam danglam hnuah pawm a ni a. Hma latu tur nodal agency an ruat nghal. State level-ah chuan Planning & Programme Implementation department ruat an ni a, district level-ah Serchhip bawrhsap ruat a ni.
Neihloh khuaa chhungtin chu an in thar sakna tur cheng nuai 15 pek vek an ni dawn a. Sum leh pai hman belh tur neiten lian zawk leh tha zawkin an chenna tur in hi an sa thei ang. In sak dan tur hi a hniam lam bituk (minimum standard) siamsak vek a ni thung. Chhungkaw thenkhatin in sak tan an duh tawh avangin mamawh hmasa chak taka bawhzui nise an ti.
Neihloh khua hi kum 1898-a din a ni a. Tunah hian chhungkaw 77, mihring 400 chuang hlek an awm mek. Aizawl- Thenzawl -Lunglei kawngpui atanga tehin an khaw thar tur hi khaw hlui aiin a hnai zawk a, a ram a tha tawk hle tih sawi a ni.
Master plan hi pawm a nih chuan Mizoram Urban & Regional Development Act 2025 hnuaia notification tihchhuah a ni ang.