Larsap-in Sainik leh Shalom School tlawh

Larsap Gen. Vijay Kumar Singh (Retd) chuan Nilaini khan Serchhip district a tlawh a. Sainik School Chhingchhip, 14 Assam Rifles Serchhip leh Shalom Special School Serchhip tlawhin zirlai, zirtirtu, ex-servicemen leh sipai a kawm.
Sainik School Chhingchhipah hian 23 Sector Assam Rifles DIG Brig. Puspendar Sorayan leh vice principal Lt. Col. Kartik Sood ten an lo hmuak a. Zirtirtu, thawktu leh zirlaite fuihin, Sainik School zir chhuak zirlai pahnihin National Defence Academy-a lut thei tura exam an paltlang chu lawmawm a tih thu a sawi.
Sainik School chu mitha leh danglam bik chher chhuahna tur hmun a ni tih Gen. Vijay Kumar Singh hian a sawi a. Armed force-ah lut vek lo mah se, an kalna zawn theuhah chhawr tlak leh danglamna thlentu nih tum turin a fuih bawk.
14 Assam Rifles Hqrs Serchhip a tlawhnaah commandant Col. Archit Goswami chuan an hnathawh a lo hrilhfiah a. Ex-Servicemen member, Govt. Serchhip College zirlai leh sipaite a kawm bawk.
Shalom Special School New Serchhip tlawhin Board member leh zirlaite a kawm bakah ei leh in tur a ken sakte a hlan a. Principal A Lalawmpuii’n school chanchin leh enkawl dan a sawizau a ni. Larsap leh Assam Rifles ten kawng engkima an ngaihtuah thin avangin lawmthu a hrilh a ni.
Shalom Special School Serchhip hi 2005 August 17 khan chief minister hlui Lal Thanhawla’n a din a. Tuna an school building ni ta sakna tur lungphum hi larsap hian Eastern Army Commander a nih lai, January 2010 khan a phum sak a, 4 Assam Rifles-in Military Civic Action kaltlangin an sa a ni. Tunah hian vohbik zirlai 36 an nei mek.