DoNER hotu leh CM inkawm

Mizorama rawn kal, Ministry of DoNER secretary Sanjay Jaju leh chief minister Lalduhoma chu Pathianni khan CM Bangla-ah an inkawm.
Mizorama sawhthing chin thin danah ngelnghet zawka North Eastern Council fund hmanga puihna tur an dilna pawm a nih avangin chief minister hian lawmthu a sawi a. Mizoramin sawhthing kan thar tha a, kan sawhthing hi a quality a thain a thianghlim a. NITI Aayog chuan Ginger Capital of India-ah min puang hial a ni, tih hrilhin, he fund hi sawhthing chingtute tan a tangkai hle dawn tih a sawi a ni.
Chief minister hian 10% GBS (Gross Budgetary Support) mumal zawk leh langtlang zawka kalpui a nih theihnan hma lak a tul tih a lo hrilh a. DoNER secretary hian lo enzui a tiam a ni.
NESIDS (Roads) hnuaia Khankawn to Rongura Hmun km.1.70 vela sei laih belhin, Thenzawl Buarpui intermediate lane a pawh thei a. A tangkai hle dawn avangin, a laih zawmna ngaihtuahpui tura a ngenna pawh DoNER secretary hian hma a lak tur thu a hrilh.
DoNER hotu hian Thenzawl Golf Resort tihchangtlunna atan private investor an luh theihna tura hma lak a tum thu chief minister hi a hrilh a. Mizoram sawrkar pending DoNER scheme project thenkhat an sawidun bawk.