Nurse thawk tha award dawng

Nurse thawk tha award dawng
India rama nursing lama thawk thate hnena chawimawina sang hlan thin National Florence Nightingale Award 2026 dawngtu zingah Tlabung Sub-Division huamchhung Tuichawng Health & Welness Centre-a thawk Lalenthangi Hnamte a tel.
May 12 kha International Nurses Day a ni a. He ni denchhen hian kumtin India sawrkar chuan nursing lama mi chhuanawm bik, an hna thawk tha thlanchhuah hnenah ram pum huapa chawimawina a neih san ber – Florence Nightingale Award hi a hlan thin. Kumtin a hlan a, kumina mi 15 dawng zingah Lalenthangi Hnamte hi a tel a, hmarchhak bikah Mizoram bakah Sikkim atangin he chawimawina dawng hi kuminah an awm a ni.
India President Droupadi Murmu chuan a chenna Rashtrapati Bhavan-ah Thawhlehni khan a hlan a. Lalenthangi Hnamte hi Health department-ah kum 25 thawk tawhin, tunah hian Tlabung Sub-Division huamchhunga Tuichawng Ayush Health & Welness Centre-a health worker thawk lai a ni. An huamchhungah hian lirtheia kal theih loh, ke leh lawnga kal ngai a awm thin a, chu’ng hmunah pawh chuan mipui hriselna atan theihtawp chhuahin an kal thin. A hna kaihhnawih piahlam thlenga mi tlawmngai leh midang tan inpea rawng bawl thin a ni a, department-in chawimawina a buatsaih tum engemawzat a dawn tawh bakah YMA pawhin tum engemawzat chawimawina a lo hlan tawh a ni.
National Florence Nightingale Award hi sawrkar laipui Ministry of Health & Family Welfare-in kum 1973 khan nurse leh nursing professional-ten khawtlang tana an rawngbawlna tha tak tak hriatrengna atana a duan a ni a. Mizorama thawk nurse 17-in he chawimawina hi an dawng tawh. Kumina dawngtu Lalenthangi Hnamte hi a 18-na a ni. Mizo nurse, state pawna thawk pahnihin an dawng tawh bawk.