University Convocation hmanpui

Larsap Gen. Vijay Kumar Singh (Retd) chuan Thawhlehni khan SDGI Global University Convocation (Ghaziabad Uttar Pradesh) hmasa ber chu khuallian niin a hmanpui. South Asian University president Prof. KK Aggarwal chu khualzahawm a ni.
Mizoram larsap chuan SDGI Global University Convocation hmasa ber hmangtu zirlaite chu dinna nghet tak nei an nih tawh avangin hmundanga an kal darh hunah pawh inringtawk turin a chah a. Beih hram hramna, inthununna, taimakna leh dawhtheihna neia tum sang tak nei tur leh, a eng zawnga thil thlira an hma zawna chona awmte beiseina nena hmachhawn zel turin a fuih. Zirlai nu leh pate chu an fate an tuina zawna kaltir tur leh an hlawhtlin ngei theihna atan tawiawm tlat thin turin a chah bawk.
SDGI Global University Ghaziabad hi Uttar Pradesh Private University Act 2019 hnuaiah 2023 July 14 khan din a ni a. Sundar Deep Educational Society-in a enkawl. Uttar Pradesh-ah zirna sang zawk tihhmasawnna atan kum 20 dawn an thawk tawh a; engineering, pharmacy, architecture, hotel management, law, education, commerce, management, polytechnic leh a dangah zirna kalpuiin, zirlai 5500 dawn a nei mek.