TBA hruaitu pathum thah hnuah Manipur boruak tang thar leh

Thadou Baptist Association (TBA) hruaitu hlun pathum chu Nilainia khan Manipur-a Kangpokpi district-a Kangpokpi leh Churachandpur inkar kawngpuiah ralthuam kenga helhovin lambuna an chuanna lirthei pahnih an beihnaah an thi a, hei vang hian kawngpui pawimawh hrang hrang khar a ni a, chi leh chi inkara buaina chhuahna state-ah hian boruak a tang thar leh hle.
Churachandpur-a TBA inkhawmpuia an chhim zo Kangpokpi pana an haw lai chu Kotzim leh Kotlen inkarah lambun an ni a. Lirthei pahnihah hian mi pariat an chuang a, pakhat chu hliam tuar lovin a tlanchhuak thei.
Thite hi Kuki-Zo zinga mi, Thadou-a TBA hruaitu, Manipur Baptist Convention-a general secretary ni thin, V Sitlhou leh pastor pahnih, Kaigoulun Lhouvum leh Paogoulen Sitlhou te an ni.
Chief Minister Yumnam Khemchand-a chuan Deputy Chief Minister Losii Dikho, Home Minister Govindas Konthoujam, MLA leh thuneitu dangte nen Imphal West-a Shija Hospital-a hliam tuarte tlawhin pawikhawihna thleng hma zawk chu ‘firfiak thiltih’ tiin a dem thu a sawi a. State sorkar chuan hliam tuarte enkawlna senso zawng zawng chu a tum vek tur thu a sawi a, thuneitute chu ‘enkawlna tha ber’ pe turin a hriattir bawk.
Khemchand-a chuan chi leh chi inkara buaina tihtawp thuai turin a ngen a. “Mipuite ka tiam a, state chhunga theihna zawng zawng hmangin thil tisualtute leh anmahni enkawltute chu rorelna hmaah kan hruai dawn a ni,” a ti.
Thil thleng duh lohna lantir nan Thadou pawlte hian Imphal-Dimapur National Highway 2 chu tiam chin nei lovin an khar a. Kuki Students’ Organisation (KSO) leh Zomi Students’ Federation (ZSF) te pawhin pawikhawihna hi an dem thu sawiin Churachandpur district-ah tiam chin awm lova inkhar a nih tur thu an puang bawk.
Kuki pawl pakhat, Kuki Zo Council chuan pawikhawihtute hi Zeliangrong United Front-Kasom (ZUF-Kamson) faction leh National Socialist Council of Nagaland-Issac Muivah (NSCN-IM) faction-a mite niin an puh a. Pawl pahnihte hian an inrawlh loh thu an sawi ve thung.
ZUF chuan ‘ZUF dik tak pakhat chauh’ a awm tih sawiin ZUF-Kamson chu hming ‘phuah chawp’ niin an sawi a, ‘NSCN-IM-in mipui rilru tihbuai nan leh Zeliangrong mite tihchhiatna atana tha lo taka a hman’ niin an sawi.
Naga pawl lian ber, United Naga Council (UNC) chuan pawikhawihna thleng hi an dem thu sawiin, a hnu darkar eng emaw zata thil thleng chu tha lo an tih thu an sawi bawk a. “Hetiang beihna thlen atanga darkar tlem te hnuah Konsakhul khuaa Naga 20 vel chu Leilon Vaiphei Kuki khuain an man,” an ti a. “Leilon Vaiphei khaw thiltih hi kan hrethiam thei lo,” an ti.
Kuki Organisation for Human Rights Trust (KOHUR) chuan pawikhawihtute lakah action lak an phut a, kohhran hruaitu leh driver thah chhungte tan zangnadawmna an dil bawk.
Nilaini vek khan Noney district-a tharum thawhna thleng dangah thi an awm bawk a. Khoupum Police Station huam chhunga Nungsai leh Joujangtek inkarah tlai dar 6:20 vel khan silai kenga helten lirthei an bei a, mi pakhat an kap hlum a, mi dang pahnihin hliam an tuar bawk.
Lirthei an beih hi Bolero a ni a, thi hi Wilson Thanga (52) a ni a, Dolang Chiru khuaa cheng a ni a, silaimu pahnih a tuar a. A nupui, Thoireithei Thanga (48) leh a khalhtu, Oliv Jatung (42), Dolana Chiru khuaten hliam an tuar a, Khoupum Health Care Centre-ah dah an ni.
Thi hi Chiru, Naga hnam a ni.