ACM Awards chan loh khana chhuak

ACM Awards chan loh khana chhuak
Kumin ACM Awards-ah hian Ella Langley hla hit “Choosin’Texas”-in single of the year leh song of te year a dawn hian mak tih a hlawh hran lo, rin lawk sa deuh thup a ni a, dawng lo se mak an ti zawk maithei. The Red Clay Strays, Brooks & Dunn leh Cody Johnson te pawhin Country Music Association (CMA) Awards-a nikum November-a an chet that an la chhunzawm ang tih an ring lawk fur a, an ring dik.
Mahse, award semnaah hian tlang rin lawk ang lo deuh hleka thil thleng a awm a, award dawng tura tlan rin dawng ta lo a, dawng tura rin kai vak lo a dawng nawlh te pawh an awm. Chutiang karah chuan Megan Moroney, Lainey Wilson, Chris Stapleton leh Zach Top te nomination belhkhawm chu 27 a tling a, mahse, kut ruakin an haw vek.
Cody Johnson-a’n male artist of the year a dawng hian mak tih a hlawh lem lo, mahse, entertainer of the year dawng tura ring lawk erawh an tam lo ang. He category-ah hian Lainey Wilson, Chris Stapleton, Luke Combs, Morgan Wallen, Jelly Roll leh Megan Moroney te nen an awmho tlat.
Cody Johnson hian kum hnih kalta khan a ACM Award hmasa ber a dawng ve chauh a, ‘Dirt Cheap’ avangin song of the year a dawng. 2020 leh 2021 khan new male artist of the year-ah nominate a lo ni ve ve tawh a, award a dawng lo ve ve bawk.
Kumin hian nomination-a langsar ber, nomination pakua nei, Megan Moroney kut ruakin a haw tlat. Moroney hian kum hnih kalta khan new female artist of the year a dawng a, hei bak hi award a la dawn belh leh ta lo. Award semnaah pawh hian a inlan lo a, a thiannu pasal neihnaah mo thianah a tan vang niin social media lamah a tarlang.
Lainey Wilson pawhin nomination pasarih neiin, award a dawng lo a, Stapleton pawhin nomination paruk a neihah engmah a dawng lo a. Stapleton hian mipa zaithiam zinga ACM Award dawng hnem ber George Strait record, award 19 chu award pakhat chiahin a la pha lo a, kumin hian record hi a rawn nihrual theih an beisei deuh thup laiin kutruaka haw zingah a tang ta hlauh a ni.
Parker McCollum chuan nomination pakhat chiah neiin, a lanna awm chhunah hian award dawngah a tang zui a, album of the year a dawng. Ani hi he category-a award dawng tura ring lawktu an tam lo ngawt ang. McCollum ian ACM Award hi 2022-ah new male artist of the year leh 2024-ah visual media of the year te a lo dawng tawh bawk a ni.
Morgan Wallen a album “I’m the Problem” chu Billboard 200 (US albums) chart-ah kar 13 chhung a No.1 thei a, heti chung hian album of the year a dawng tlat lo. A album hmasa “One Thing at a Time” pawh he chart-ah ian kar 19 a No.1 kumah album of the year hi a dawng lo tawh bawk. 2022 khan “Dangerous: The Double Album” avangin ACM album of the year hi a dawng ve thung. Chuvangin album hralh kal nazawngin award an dawng kher lo tih a lantir a ni ber awm e.
Kelsea Ballerini pawh a la vanduai leh tlat, female artist of the year-ah a vawi kua nan nominate a ni a, mahse, he category-ah hian award a la dawng ta lo. Tihian Anne Murray nen he category-a tum 9 nominate ni tawhin award dawng loah an la tang ve ve a, an record siam dan a duhawm chiah lo.