Education ‘pawn lam’ leh ‘chhung lam’

Higher & technical education minister Dr. Vanlalthlana chuan school upgradation leh RUSA faculty regularisation chungchangah nimin khan Press Conference a nei a. Criteria hrang hrang paltlang thei school 51 (Higher Secondary School-12; High School-34, Middle School-5) te sawrkar enkawlna hnuaia dah (provincialised) a nih thu a puang a. Kum 2023 September ni 27-a Council of Ministers meeting-in ‘Upgradation of Schools’ chungchanga memorandum lut a pawm tawh, school 340 dinhmun hrang hrang chawisanna atana thutlukna an siam kal zel kha a ni.
‘The Mizoram Education (Lumpsum Grant-in-Aid for General Maintenance of Private School) Rules, 2025’ hmanga Adhoc School te (Provincialised tak loh te) leh Provisional Adhoc School ni tura lo tih tawhte chu Special Category 1 leh Special Category 2-ah dah an ni dawn niin education minister chuan a sawi a. Sorkar sumin a phak tawk leh tehna siam sa hmangin hma an la tih sawiin, provincialised tak lohte an ngaihsak lo bik tihna ni lovin, tehna awm sa hmangin, Adhoc School-te tan, a huam zau thei ang berin hma an la zawk a ni tih a sawi a, chu chu hriatpui turin Adhoc School zirtirtute leh an chhungte a ngen tih a sawi bawk a ni.
Heng thilte hi education pawn lam siam thatna a ni a, thil pawimawh tak a ni. Sawrkar pawhin theihtawp a chhuah niin a lang. Chutih rual chuan, a pawimawh zawka erawh, chhung lam (Learning Outcome) siam thatna hi a ni kan ti thei ang. Zirtirtuten sawrkar enkawl school-a thawha hamthatna tha zawk dawn an duh a, chumi dinhmuna inhlangkai tura nasa taka an beih thin ang hian, an enkawl zirlaiten zirna tha zawk an neih theih nan hian engtiang chiaha nasain nge an beih ve zawk? tih hi zirtirtute pawh hian inenfiah nan hmang ve thin se a duhawm hle. Tuna school education minister leh education department-a thawktuten school upgradation chungchanga hma an lak dan han en hian, theihtawp takmeuh an chhuah niin a ngaih theih a, tuna dinhmun chawisan theih loha la awm mekte pawh hian a pawng ataka thuneitute nawr buai mai lova, dinhmun sang zawka an inhlankai theih nan zirna quality tha zawk nei thei turin theihtawp han chhuah ve se, thil chu a fel chhawm ve maiin a rinawm. School upgradation kan buaipui rual hian, kan buai chhan ber zirlaite quality (learning outcome) lam hi kan hrechang lo mai ang tih te pawh a hlauhawm rum rum thei awm e.