Inthiar rei lutuk hriselna atan a pawi thei

Inthiarnaah phone kan keng lut a, social media kan en, thl kan chhiar kual a, WhatsApp, Facebook leh Instagram te kan hmet kual a, minute nga chhunga inthiar zo mai tur pawh minute 20-ah a te kan tho thei hram a ni ta! Chutia inthiarna a rei tak tak thut chu thil pawi awm turah pawh kan ngai lo tlangpui ang.
Doctor te chuan inthiarnaa rei tak thut hi thutthleng pangngai emaw sofa emaw-a thut nen a inang lo an ti. Dr. Partap Chauhan chuan, “Miin inthiarnaah engtia rei nge an thut tih an ngaihtuah ngai lo. Inthiarnaa thu chungin smartphone hmanga social media en, text thawn leh chhan, video clip tawi te en hi thil tih thanah kan nei tawh. Mahse, he kan chin than hian pum leh mawngkaw hriselna lamah harsatna nasa tak a siam theia ni,” a ti.
Dr. Pratap chuan, “Ayurveda-ah chuan inthiar hi nitina taksa atanga bawlhhlawh paih chhuahna hmanrua pawimawh ber a ni a, rei tak inthiarna a thu tura duan kan ni lo. I taksa chu rang taka bawlhhlawh paih chhua thei tura duan a ni, he a hnathawh dan pangngai hi tih khawtlai emaw tihbuai emaw a nih chuan i taksa natural balance a tibuai thei,” a ti bawk.
Inthiarnaa thut rei lutuk hian mawngkaw thinsen zam leh kawng hnuai lamah nawrna (pressure) a insiam a, a lo rei hnuah chuan piles, vûng, thak, nuam lo, emaw inthiar zo tha thei lo anga inhriatna a thlen thei.
National Institute of Diabetes and Digestive and Kidney Diseases (NIDDK) chuan “inthiarnaa rei tak thut thin hi” piles (hemorrhoids) thlen theitu zinga pakhat a nih thu chiang takin a tarlang.
Inthiarna a rei tak thu thinah chuan harsatna hi zawi zawiin a intan thin. Inthiarnaa rei tak tak thut chu taksa chuan ngaiah a nei ta a, chu chu a pawi ta thin a ni. Inthiarna a kan thut rei zawh poh leh inthiar kan harsat telh telh thin.
Inthiarnaa thut rei hian mawngkaw lam thinsen zam te chuan hnuai lama zawnga nawrna nasa zawk an tawh phah a. Ek khal, emaw tui in tlemin emaw a belh leh phei chuan a pawi lehzual thin. Chuvangin pum lam doctor (gastroenterologist) te chuan inthiarnaah minute nga atanga 10 vel bak thut loh an râwn thin.
Inthiarnaah i thu rei thin lutuk a nih chuan hengte hi i neih phah thei:
​Ek khal emaw kawpuar
Inthiar laia thisen chhuak
Inthiar zawnga na awm
Inthiar zo thei lo anga inhriatna
Mawngkaw thak emaw vûng
NIDDK hemorroids guide note-ah chuan inthiarnaa thut rei lutuk hian a symptom a tizual thei niin an tarlang bawk.
(Times of India atanga lak chhawn a ni e.)