Poshan Pakhwada khar

Poshan Pakhwada khar
Poshan Pakhwada 2023 kharna chu Thawhtanni khan Aizawlah Social Welfare & Tribal Affairs minister Er Lalrinawma hoin hman a ni.
Minister chuan ei tur tha chu mihring chauh nilo ramsate pawhin an mamawh a, khawvelah eitur tha awm danin mihring leh ramsa population a nghawng a, kan nun khawchhuahna kawngah thui tak a innghat tih a sawi. Kumin hi ‘International Year of Millets’ a puan a nih angin millets (Buhtun) chu chaw tha a nih hre thar a, zunthlum veite tan pawh Glycemic Index hniam chaw, mitin tana ei him a ni, tiin, buhtun chu buh (rice) aiin rei tak a dahthat theih a, taksa in a ngeih loh glutten pai lo a ni, tih te a sawi bawk.
March 20 atanga April 3 thlenga programme hrang hrang duan hlawhtlinna chu thawktute inpeknaah a innghat tih minister hian a sawi a ni.
Social Welfare deputy director Saipari chuan Poshan Pakhwada 2023 hman dan a sawi a. Commissioner & secretary Madhup Vyas chuan ‘Eradication of malnutrition’ tih thupui hmanga painting inelna lawmman a sem a ni.
Serchhipah a kharna hman a ni a, Addl. DC Lalmuansanga Ralte chuan a hmanpui. He hun hi department-a thawktute bakah Anganwadi Centre hrang hranga thawktute an tel.