SIR hi electoral roll-a awm tur dik tak an awmna atan ruahman a ni – ECI deputy director

Special Intensive Revision (SIR) neih chhan ber chu India khua leh tui dik tak, electoral roll-a chuang thei chin chuan tir a ni tih Election Commission of India deputy director (Media) Apurva Kumar Singh chuan a sawi.
Mizorama SIR 2026 kalpui tum mek dan enpuia rawn kal ECI deputy director-in Aizawl-a thuthar thehdarhtute a kawmnaah SIR hi kum 20 kalta khan neih a lo ni tawh a, hemi hnu lamah hian awmna veng/ khua, district, state thlak leh ram pawn hmun danga pem ta pawh an tam a, hemi hun laia khua leh tui la ni lo, dan dik tak hnuaia electoral roll-a chuang thei ta pawh an awm anga, chu’ng zawng zawng felfai zawka chinfel pahna atana tih a ni tih a sawi.
Chutihrualin, dan dik taka electoral roll-a chuang thei lo paihna pawh a ni tel a, hei erawh SIR thil tum leh neih chhan ber niloin, a ken tel pakhat mai a ni tih a sawi. Zawhna chhangin ECI hotu hian, electoral roll-a chuang thei lo hmuhchhuah an awm a nih pawhin, roll atanga paih bak an chunga hma lak zui zel chu ECI tih tur piahlam a ni a, an ni ngaihtuah tur a ni lo tih a sawi a ni.
Zawhna dang a chhannaah, SIR 2026 kalpui tura Mizoram inbuatsaihna tha a tih thu a sawi a. In tin tlawhchhuaka buaipui tur booth level officer pakhatin mi sang khat tling lo zel buaipui tur an nih avangin, hneh takin an buaipui thei turah an ngai a, puih an ngai a nih erawh chuan volunteer hman tel theih a ni tih a sawi.
Kum 2005-a SIR neiha hming chuang tawh emaw an nu leh pate India khua leh tui an ni ngei tih finfiahna tur nei tha, pawm tlak china ngaih theih sa awm thinah Mizoramah chuan zaa 80 vel hetiang hi a nih phak a ring tih ECI deputy director hian a sawi a. Chu chuan hna a tih awlsam phah thei tih a sawi a ni.