Lemziak mite inkhawmpui

Treasury Square-ah Lianchhiari Run a awm a, Lianchhiari Runah chuan Art Gallery a awm. Chu Art Gallery-ah chuan lut la, lem an lo ziak luih luih ang. A huhova chutianga lem an ziak lai chu hmuh tur a vang mai thei.
Mizoram Art Development Society (MADS) te’n Art Workshop an buatsaih a, workshop han tihah thusawi leh paper buatsaih lam a ni lo, lem an ziak luih luih!
MADS hi lemziak mite intelkhawmna pawl a ni a, member hi 100 chuang an ni. Workshop-ah hian an member a thei thei an tel a, inzirtir emaw thusawi ngaihthlak emaw lam a ni lo, lem an ziak a, an nileng thak thak.
Workshop neih mekah hian mi 60 vel an tel a, an zinga pariat emaw chu hmeichhia an ni. Mahni duhzawng an ziak a, entawn neih an phal lo.
“Entawn neia ziah hi tih dan pangngai pawh a ni a, tun tuma entawn neih loh kan tih chhan hi chu, exercise atana kan tih a ni a, mahni rilrua lang kha rilrua a lan dan ang anga ziah mai kha hmasawn nan a tul kan ti a ni,” an president Vanlalhriata chuan a ti.
Thawhlehni-ah an tan a, Zirtawpniah an zo ang. Ningani khan pathum ziak tawh te an awm a, pakhat mah la zo lo te pawh an awm. Pencil, water color, acrylic, oil, mahni duh duh hman an phal a, hmeichhe pakhat chuan dozen clay a hmang.
Hmun hrang hrang atangin an kalkhawm a, Champhai atanga kal te, huan neia awm chilh, huan atanga kal te pawh an awm. Kalna hla ber chu Shillong atanga kal a ni a, “Pawl thiltih a ni a, ka ngai pawimawh a ni. A nuam ka ri hrim hrim a, hlawkna chhar tur a awm bawk,” a ti.
He workshop-a telte hian hetianga a huhova ziah hi hlawk an ti a, a nuam an tih bakah a hlawk an ti. ‘Thil kan inhrilh tawn a, kan expirience te kan inhrilh a, tih dan tha zawk nia kan hriat te kan sawi a, chu chu kan hlawkpui a,’ an ti. Tuina inang, tlang hrang hranga mite hetia an inhmukhawm hi nuam an ti a, an hlim hle!