Hezbollah an chet loh chuan Israel leh Lebanon ten inkahhai pawm

Israel leh Lebanon chuan an inkahhai chhe tawh tak chu siam thar lehin Lebanon chhungah ‘pilot’ security zone eng emaw zat siam an remti a, he hmunah hian Hezbollah an awm khap an ni dawn tih US State Department chuan a puang.
Inremna hi Iran thlawp ralthuam keng pawl, Hezbollah-te beihpui thlakna chu ‘awm tawh miah lohna’ a ni a, kal dan tur dangte pawh a tel.
Nilainia Israel-in Lebanon chhim lama beihpui thlaka mi pakua an thih hnu leh Hezbollah-in Israel hmar lama rocket a kah hnu, Thawhtannia inremna siam inkahhai an enchhin hnuah a ni.
Thuchhuah chuan, “Eng ram emaw, ram ni lo emaw pawh, Lebanon hma lam hun atana buaina awmtir tumna eng an hnawl a ni,” a ti.
Washington-a US kaihhruaia inbiakna vawi li neih a nih hnua inremna siam hi Lebanon chhim lama Israel-in a thunun hmun, Litani lui atanga ramri thlenga ‘Hezbollah zawng zawngte chhuahtir’ a nih tur thu a innghat a ni.
Hezbollah hi Shia Muslim politic leh sipai pawl an ni a, Lebanon-ah hian an awm a, Israel nen hian tharumin an inbei nasa hle a. Israel leh ram dang tam takin firfiak pawlah an ngai a ni.
Thuchhuah chuan US chuan ‘Pilot zone siam a pui dawn a, hei hi Lebanon Armed Forces-in sorkar hnuaia mi ni lo zawng zawngte tel lova ram chu a thunun theihna tur a ni’ tih a ni a. Zone hrang hranga hmalak dan tur hi chipchiara tar lan a ni lo.
Thawhtannia inkahhai pawt sei tura inremna siam a nih hnua puan a ni a, hei hi Lebanon chuan Israel-in Beirut a beih tawh lohna tur a ni a, Hezbollah-in Israel a beih lohna tur a ni bawk nia sawi a ni.
Ram pahnihte hi June 22 hian an inhmu leh dawn a, ‘inremna kimchang siam tumna nen’ an inbe chhunzawm ang a. Hezbollah hian he thu puan chungchangah hian engmah a la sawi lo.
Partial ceasefire chu tun kar chhung khan Israel leh Hezbollah chuan an enchhin a. Heti chung hian Lebanese health ministry chuan Nilaini khan Israel-in a thah zingah hian damdawi thiam pahnih an tel a, an ambulance chu Chehour chhim lam biala beihpui thlaknaah kah a ni a. Beirut chhim lamah car kah a ni bawk.
Hetihlai hian Israeli sipaite chuan ramri paltlang drone leh projectile pahnih an lo dang niin an sawi a. Hezbollah chuan Israel sipaite pungkhawm chu an beih niin an sawi.
Thawhtannia inkahhai thuthlung (partial ceasefire) inremna Lebanese sorkar chuan Hezbollah pawhin a pawm tih a sawi a; mahse, an pawl political council member, Mahmoud Qamati-a chuan Thawhlehni khan BBC hnenah, “Inkahhai thuthlung a awm lo va, Dahieh humhalhna chauh a ni,” a ti ve thung.
Lebanon hi March 2-a US leh Israel leh Iran indonaah a tel ve tan a, Hezbollah hian Israel-in Iranian supreme leader a thah avanga phuba lak nan Israel-ah rocket an kap a. Israel chuan Lebanon pumah thlawhna hmanga beihpui thlakna leh chhim lam khawmualah beihpui thlakin a chhang let a ni.
April 16-a Israel leh Lebanon inkara US-in inkahhai a siam chuan indona hi a titawp thei lo va, kar hmasa khan Prime Minister Benjamin Netanyahu-a chuan a sipaite chu drone leh rocket hmanga an ram hmar lam beih a nih avangin Hezbollah beihna nasa zawk leh Lebanon ram thuk zawka lut turin a ti.
Lebanon-ah hian indona a chhuah atangin mi 3,516 an thi tawh niin an ram health ministry chuan a sawi a. UN chuan mi maktaduai khat chuang hmun hima insawn angin a sawi a, Israel-in hmun danga chhuak tura thupek a siamte hian an ram hmun riat thena hmun khat aia tam a huam niin an sawi.
Israel chuan indo lai hian ramri lehlamah an sipai 26 leh Israeli civil mi pali an thi tih a sawi ve bawk.