FIFA World Cup 2026 official album

FIFA World Cup 2026 official album
FIFA World Cup pualin official album an tlangzarh thin a, kuminah pawh official song bakah official album an nei leh dawn a, he album-ah hian hla 18 a awm dawn a, World Cup puala album siam tawhah chuan a la huam zau ber niin an chhal.
He album-ah hian khawvela culture chi hrang hrang pholanna turin genre hrang hrang an dah khawm a, chung zingah chuan zaithiam te an thawhhona hla pawh a awm nual a, Blackpink member LISA, Anitta leh Rema te thawhhona ‘GOALS’, Future leh Tyla zaidunna “Game Time,” Jessie Reyez leh Elyanna te zai dunna “Illuminate”, Stromzy, Fridayy leh Angel te zaihona “Blessings” bakah kumin World Cup official song Shakira leh Burna Boy te thawh dunna “Dai Dai” pawh a tel ang.
He album-ah hian hranghlui lam atangin The Rolling Stones pawh an tel dawn a, “In the Stars (Remix)” album-ah hian an bilh tel a, Alejandro Fernandez, “Mi Mexico Lindo”, country superstar Jelly Roll leh Carin Leon “Lighter” te pawh a tel ang.
FIFA President Gianni Fantino chuan thuchhuah siamin, “Khawvel puma fan-te inpumkhat nan music leh football thiltihtheihna lantor nan Official FIFA World Cup 2026 Album-ah hian khawmualpui tin bakah tawng chi hrang hrang leh genre hrang hrang te dakhawm a ni,” a ti.
He album hi streaming platform hrang hrangah a awm dawn a, hei bakah hian Countdown Concert an neihna Mexico, Toronto leh Los Angeles-ah te live a ngaihthlak tur pawh a awm nual dawn a, Mexico, USA leh Canada a opening ceremony an neihnaah pawh album-a hla neite hi an perform nual dawn a ni.
FIFA World Cup 2026 hi June ni 11 a tan tur niin, July ni 19-ah final an khel dawn a, kumin hian a vawi khat nan final match-ah halftime show a awm dawn a, he show-ah hian Shakira, BTS leh Madonna te an perform dawn a, final hi MetLife Stadium, New Jersey-ah khelh a ni ang.