Industrial area-a dik lo taka ram nei chungah khauh

Sawrkarin industry dinna atana ram a ruahman chhunga dik lo taka ram lo neite chungah khauh takin sawrkarin hma a la dawn tih Industries minister F Rodingliana chuan a sawi.
Commerce, Industries, Geology & Mining minister F Rodingliana hian June 5 tlai khan Industrial Estate Zuangtui a tlawh a. Industry hrang hrang – plastic tanky industry, handloom industry, water bottling plant, toughened glass siamna leh tin roof industry tlawhin, an hnathawh a endik.
Minister hi Mizoram Industries Owner’s Association hruaituten an lo kawm a. Industry hmangaihtu minister an nei chu lawmawm an tih thu sawiin, industrialist-ten harsatna an tawh hrang hrang an thlen.
MIOA hruaitute hian Mizorama entrepreneur-ten industry dinna tur ram an hmuh zo tawh loa, industrial area awmsa pawh nek leh midangin an luahsak fo avangin harsatna an tawk a, hei hian central scheme an dil hmuh ve thiehna tur thlengin a tibuai tih sawiin, an buaina hi chinfel sak turin an ngen a ni.
Industries minister chuan, industrialist-ten harsatna an sawi chu sawrkarin theihtawp chhuahin a ngaihtuah mek tih a hrilh a. Industrial area chhunga diklo taka ram nei chungah khauh taka hma an lak tur thu a sawi. State tan industry-a hmasawnna pawimawh zia sawrkarin a hrechiang a, entrepreneur leh industry hmasawnna atan environment tha siam turin theihtawp an chhuah reng tih a sawi a ni.