Taxi khalhtute hi kan tour guide leh kan information centre an ni – Tourism minister

Tourism department-in kum 2025-a “Taxi Driver Tha Ber” chawimawina an hlan H Laldanmawia lehkhabu ziak “Taxi Pu Titi” tih chu Tourism minister Lalnghinglova Hmar chuan a tlangzarh.
Minister chuan, taxi khalhtute chu Tourism department thlirnaah chuan tour guide an ni a, kan information centre hmasa ber an ni bawk tia sawiin, “Taxi driver kan neih that chuan tourism-ah kan thang dawn a, kan neih that loh chuan rela lo lutte hi an lo kal nawn tawh lo maithei. An lo kal nawn fo erawh chuan tourist hmun tha tak kan ni mai dawn a, chuvangin kan inkungkaihna hi a hnai em em a. Khualzin lokal zawng zawng deuhthawten kan rama an rawn hman hmasak ber an nih avangin keini tan chuan an pawimawh hle,” a ti.
Taxi driver-te chu Mizoram phurtute an ni tih a sawi a. Mi chi hrang hrang an phur a, mikhualten Mizoram chanchin chiang zawka an rawn hmelhriatna hmasa ber an ni, tiin, “Mizoram hi in phur a, in pawimawh takzet. Taxi driver tam tak hi chu Mizoram tana pawimawh leh hnam tana mi hlu in ni. Chutiang chiah chuan thenkhat chu an tangkai tluk zetin hnam tana pawi khawih thei an ni bawk,” a ti.
He lehkhabu ziaktu H Laldanmawia hi kum 2025 khan World Tourism Day-ah taxi driver tha lawmman dawng tura thlan a ni a. Amah hi vengchhung chanchinbu leh hmun hrang hrangah thu lo ziak tawh thin a ni.