Taxi driver-te
Tourism minister chuan taxi driver-te hi ‘tour guide’ an ni a, ‘information centre hmasa ber’ an ni, a ti a. Mi chi hrang hrang an phur a, mikhualten Mizoram chanchin chiang zawka an rawn hmelhriatna hmasa ber an ni a, Mizoram hi an phur a, an pawimawh tak zet a ni’ a ti bawk. He thu hi kar kal taa ‘Taxi Pu Titi’ lehkhabu a tlangzarhnaah tourism minister hian a sawi a ni.
Ni e, taxi driver-te hi khualzin tam zawkin Mizoram an lo luh phata mihring an hmachhawn hmasak berte an ni. Chu mai chu a la ni lova, Mizorama an cham chhunga hmun hrang hrang fan kual nana veivahna hmanrua an hman rim ber pawh taxi tho. Mizoram an chhuahsan dawna phur haw lehtu pawh taxi driver-te bawk. Tourism minister-in ‘tour guide’ tia taxi driver-te a vuah hi a inhmeh hle a ni.
Chuti ni se, taxi driver-te hi mikhualte hnena Mizoram leh a chhunga cheng Mizo hnam ziarang lantirtu pawimawh berte zinga mi an ni kan tih mek lai hian, eng tiang chiahin nge taxi driver-te hi khualzinte lo dawnsawn dan turah awareness kan pek thin? Tourist thenkhatin social media lamah taxi fare a sâng tia an sawi thawmte hi thuneituten an bengkhawnin an bawhzui reng em? Taxi driver-te pawimawhna kan sawi vawng viau rual hian, hmingchhiatna pawh thlen theitu an nihna zawnah, engtiang chiahin nge zirtirna kan pek thin tih hi kan inzawh a pawimawh hle bawk awm e.
Taxi driver zingah fel tak tak, khualzinte pawhin social media lama an fak zui mawlh mawlh tam tak an awm laiin, zu rim nam thur thur chunga khualzinte lo hmachhawn duh mai pawh a awm theih a. Chutiang mi chuan khualzin lakah pawisak an nei tehchiam lo maithei. Social media thenkhata “Mizoram chu a nuam lutuk, bla bla..” tih changchawia Mizoram lo zin vang vangten, Mizoram leilung an rawn rah ruala taxi driver zu rim nam thur thur an rawn hmachhawn nghal mai chuan, “E heu! hei hi maw Mizoram chu!” tih chu mikhual laka kan lan dan hmasa ber (first impression) a ni ang a, taxi driver zu rim nam thur thurin uchuak taka taxi fare a laksak phei chuan, Mizorama cham rei chakna a reh rawih ngei ang. Hetiang hi thil thleng thei a ni a, taxi driver-te eizawnna hna (profession) hi mipui rawngbawlna, khualzinte rawngbawlsaktu, Mizoram mipuite tihmingchhiaa tihmingtha theitu an ni a, tun aia uluk zawka taxi driver-te hi kan chher hriam a pawimawh dawn ta hle tihna a ni ber awm e.