COCKROACH JANTA PARTY (CJP) – CHUKCHU PARTY CHU LE!

David Lalrinchhana
Cockroach Janta Party (CJP), a sap tawng chuan ‘Cockroach People’s Party’ tihna mai, Indian Satirical Political Movement lian tak ni mek chu May ni 16, 2026 khan din a ni a. A dintu hi Abhijeet Dipke niin, Aam Aadmi Party tan pawha political communications strategist tha tak lo ni tawh thin, zirna leh mahni mimal hmasawn duhna (ama sawi danin) avanga Boston university, USA lama awm mek a ni. CJP lo din chhuah chhan tak chu kan hriat theuh angin Chief Justice of India, Surya Kant thusawi pakhat avangin a ni a; May ni 15, 2026 khan thalai hna nei lote chu CJI chuan “Chukchu” leh “Parasites of society” tiin tangkaina nei lo, mi dang thawhrah zar zoa nung ve satliah ang main a tehkhin a. A tawngkam takah phei chuan heti hian a sawi bawk a:
|halaite zingah Chukchu ang mai an awm, eizawnna mumal leh hna tih tlak nei lem lo an ni. Chûng zînga thenkhatte chu chanchinbu mi-ah te, social media lamah te, RTI activist leh activist dang hrang hrangah te lo chhuakin, mi zawng zawng an bei chiam chiam mai a ni.
Chu tawngkam dengkhawng tak avang chuan India ram thalaite chu an sahuata khawih ang main an phu suau a ni ber a, CJP a lo din phah ta a nih kha. CJI pawh chuan a thusawi chu rawn sawi fiah vatin, media lamin an ziak sulah puhin a sawi tum chu ‘degree lem leh belh chian dawl lo’ neite a sawina chauh niin a sawi a, mahse, awmzia a nei tawh lo. A hming pawh Chief Justice of India tawngkam pakhat leh ruling party ni mek BJP hming la khawpin Cockroach Janta Party tih a ni nghe nghe. Din a nih hnu lawk rei lo te tak takah mi 350,000 lai website lamah in sign-up an awm a, tun dinhmunah hian Instagram lamah 22.1 million followers an nei mek hem mai. Hei hi BJP (9.4m), INC (13.7m) leh AAP (1.9m) te chuan an pha lo nasa hle. He movement hi social media chauh ni loin a taka chet chhuah te pawhin an kalpui tel a. Volunteers te chu protest nei tawk te awmin, a thenin Chukchu anga inthuam leh inchei danglamin khawlai tihfai hnatlang te an lo nei ve bawk a nih kha. Heti taka an len takah chuan Election Commission of India lama la in register si loin India ram thalaite nghawng thil issue hrang hrangah active takin an lo inlar chho zel a ni.
Party Thu Ken leh Tum
A tuk lawkah an leader Abhijeet chuan CJP zawm turte tana tul leh pawimawhte a lo sawi a hetiang hian:-
lHna nei lo
lThatchhe tak
lOnline reng mai
lAwmze nei zawka vuivai thiamna
CJP hian an website design atan te, an promotion atan leh thlalak theh darh turte chu AI hmang tangkaiin an siam deuh vek a, an party logo te pawh AI hmanga siam a nih hmel.
|halaite pual, thalaite din leh thailaite tana thawktu nia inchhalin, ‘secular, socialist, democratic leh lazy’ tih chu an party lungphum a ni a. Thu tak deuh sira fiamthu leh tih elna lam zeh tel chu an party nihna lian ber a ni awm e.
An Manifesto atan te pawh chutiang zelin tih elna sira thu tak leh pawimawh ru tak tak si an chhawp chhuak a:-
tChief Justice te chu an retirement lawmman atan Rajya Sabha MP seat pek an ni tawh lo ang.
tVote dik taka nei paihsak an nih chuan Chief Election Commissioner chu UAPA hmanga man a ni ang a, vote thlak theihna inlak bosak chu terrorism aiin a nep bik lo.
tHmeichhiate chuan 50% reservation seat parliament member nih theih zat tipung si loin an nei ang a, cabinet post atanga 50% pawh hmeichhia an ni ang.
tAdani Group leh Reliance Industry ten Media an neih zawng zawngte chu an license cancel-sak tur an ni ang a, Independent media chawi sanna atan a ni ang. Godi media thupuangtute bank account chu chhui zui an ni bawk ang.
tMLA emaw MP te anmahni tlinna party chhuahsana party dang zawmte chu kum 20 atan election chuh thei lo leh public office luah thei lo tura hrem an ni ang.
A hnua Anjali Bhardwaj rawtna anga an pawm leh point dangte chu:
tAn party chu RTI act hmanga engkim zawh leh chhang thei a ni ang.
tSecret Cockroach CARES Fund (PM CARES Fund sawi hlawh tak) siam a ni ve lo ang.
An Party Dintu leh Hotute
Cockroach Janta Party dintu ber Abhijeet Dipke hi kum 30 mi niin, Political communication strategist an tih ang hi a ni a. Social media leh digital khawvelina mihringte politics thlir dan kawnga awmzia a neihzia lantirtu leh mipuite message thawn chhuak a, an ngaihven zawng chhawp chhuahsak kawnga thawktu lian tak kan tithei awm e. Party atanga politics lut ni loin, Digital media atanga lut a ni, an ti hial reng a ni.
Journalism subject-ah Undergraduate Pune lam atanga zo niin, Boston University, USA atangin Public Relation lamah Master degree a nei leh bawk. Kum 2020 atanga 2022 chhung khan Aam Aadmi Party-ah social media lam tana thawk turin a inpe a. Kum 2020-a AAP-in Delhi lama sorkarna an chan tum pawhin social media kaltlangin meme hmanga nasa taka mipuite rilru leh titi hruai kawitu tha tak a ni.
Nilaini maia an party Spokesperson tur pathum an ruat tharte chu – Saurav Das, Vijeta Dahiya leh Ashutosh Ranka te an ni. Saurav Das hi investigative journalist niin, ani hi Chief Spokesperson ber a ni nghe nghe a. Nikum lawka India Gate bula anti-pollution protest-ah pawh a meizang hlaptu a lo ni tawh bawk. Vijeta Dahiya hi ziak mi ni bawk, film siamtu leh content creator ni bawk a ni a, ‘Power of Universe’ tih leh ‘To Hell With That Job’ tih lehkhabu a lo khawr pum ve zan tawh bawk. Ashutosh Ranka pawh hi IIT Kanpur leh London School of Economics chhuak ngat niin, McKinsey & Company, London tana lo thawk tawh a ni bawk. Ani pawh hi nikum lawka India ram rawn let niin, Amaira Suicide case leh NEET paper leak chungchangah te pawh public movement hruaitute zinga mi a ni.
Chutih mek laiin March ni 14, 2026 maia Jodhpur Central Jail atanga sorkarin a chhuahtir climate activist Sonam Wangchuk pawhin CJP zawm a tum thu a rawn sawi nghal a. June ni 5 thlenga engmah danglam a awm loh chuan June ni 6 a protest lo awm turah CJP a zawm tur thu a lo aupui ve bawk a ni.
Anni bakah hian MP ni lai atangin Mahua Moitra, Trinamool Congress MP ni mek pawhin a social media lamah a support hle a. Shashi Tharoor Congress MP ni lai pawhin he movement a support thu leh thalaite chu zawm vek tura a fuihna thu article te hial a chhuah bawk a. Kirti Azad leh Akhilesh Yadav te pawh politician zinga ualau taka CJP thlawptu an ni.
An Protest Chhan Tur Chu
June ni 6 a protest neih an tum thu chu June ni 3 khan an spokesperson te hian an sawi tawh a. An hotupa Abhijeet pawh US atanga a lo thlen veleh parliament kawta Police station-ah Jantar Mantar-a Protest neih phalna dilin a tlang nghal dawn thu an sawi a, he protest boruak hi a nep lo a, politician lar tawh leh activist lo support-tu an tam nen, mi an tam a rinawm.
An thupui lian ber tur chu ‘Education Minister bantir’ a ni. Tun hnai India ram pum level atana exam buatsaih hrang hranga hming chhiatna te, NEET (UG) paper leak leh exam cancel a lo awm fo tak avangte hian a mawhah lain India ram zirlaite lungawi nan Education Minister a ban a ngai tih chu an au hla lian ber tur a ni a. Tun hnaia CBSE Chairman leh Secretary transfer satliah maia lungawi thei an ni tawh lo a, heti taka system rintlak lo kan nei te, Technology lama khawvela hma hruaitu nia inchhal siin data exposure awm maite chu India ram security leh thalaite hmakhua atan pawh thil tha lo tak a nih theih avangin ram pum anga mualphona lian takah an ngai bur a, a mawha lain Minister ban ngei hi tul an ti tlat a ni.
Sawi Zuina
An ding tir chauh naa chu Union Minister Kiren Rijiju leh Sukanta Majumdar te chuan an social media lamah an lo chhang ve vat bawk a; anni hian an follower tam zawkte hi Pakistan atang an ni deuh vek an ti a, Rijiju phei chuan Conspiracy theory avanga hming thang George Soros gang nen a sawi zawm nghe nghe. Amaherawhchu, CJP lamin an follower te awmna location an rawn tar lan (94% India) hnu kha chuan an reh ta thung a. Hetianga mi vau leh nawr beh te, sawi nep te hi an thiam em avangin hetiang hi a thleng ta reng niin Abhijeet hi chuan a sawi a. Nepal leh Bangladesh angte hi India Gen Z te hian an thlentir thei reng a ni tiin vaukhanna ang deuhin a chhang let ve a nih kha.
India ram chu ram lian, mipui tamna ram kan ni a, mi tin tan hna inpek a harsa lo thei lo. Chu akarah kan sakhaw vawn leh khawsak phungin a zir loh vang nge faina leh thianghlimnaah kan hniam hle a, kan resource neihin a tlin lo bawk. Chutiang kara ram hruaitu nih pawh hi hautak tak tur a ni a, sorkar leh constitution tha tak kan neih azarah zirna kan dawng tha a, mipui kan fing zel a, sorkar tan pawh mipui hmasawn leh lehkha thiam tamna chu pal zam kan har tulh tulh reng dawn a ni. Hna nei lo tam tak India ram thalaite hian social media leh hmun dang dangah an hun awl an hnawh khat a, an lungawi lohna leh sorkar laka an vuina te an aupui nasa ve thin. Chutiangah chuan uchuak leh Zo-nun ze mawi tel ve hauh loa rak piap piap an tam ve phei chuan a fawng vuantu tan chuan hmuh leh ngaihthlak hrehawm tur a tam ve hle awm e. Amaherawhchu, kan rin em em leh nihna sang tak nei CJI meuh ka atanga ‘Chukchu’ ang maia tehkhinna chhuak kha a mawi loin a uchuak tak zet a, India ram thalaite tih tlak tak tak leh ram tana contribution ngah an tam viau nen, a vai hma pawp mai kha a tisual tak zet a ni.
Democracy ram kan nihna ang takin miin an lungawi lohnate leh an vuinate hi zalen taka an aupui ve theihna dan kan nei miau a. Tin, democracy rama cheng mipuite hi Pressure cooker chhunga cheng ang kan ni a, kan boruak tawn sa leh uap lutuk chhuahna tur vent tube kan mamawh a, chu lai hmun chu tih pin a nih a, valve mumal kan neih bawk si loh chuan kan lo puak darh ta mai thin reng a ni. Chutiang chiah chu CJP lo din chhan pawh hi niin a lang, thalaite vuina leh inhrikthlak vena awm chhun ang angte tihtawpsak a, umzui a, vau fo te hian a tawpah ring taka puah durna a thlen duh chawk a nih hi maw.