Paris lalnu thar a piang ta! A hming Andreeva

Russian tleirawl kum 19 leka upa Mirra Andreeva chu kum 18 mi ni chunga 1992 champion Monica Seles hnu lama Roland Garros women’s singles title la leh thei naupang ber niin, a Grand Slam trophy hmasaber a sualchhuahna kawngah Inrinni zan khan French Open final match-ah harsatna lian tawk loin Poland nula Maja Chwalinska lakah 6-3, 6-2 hnehna nuamsa a chang.
Court Philippe Chatrier-ah khan kumin zet chu vantlang rin loh pahnihin final an khel a; Pole Iga Swiatek ropui loh kumah a chipui leh amah tia lek tur Chwalinska chuan final a lut nawlh a; lasi thawnthu ang maia a kal tluang lai erawh final-ah a chhunzawm zo ta lo a; qualifying atanga huaisen taka inlan thin world number 114 hian match kaw chhung tehreng a chak zawnna a thlah a ngai ta a, Polish fans za telin lunghnur takin an hero thar chak zo lo lai an thlirliam!
Eighth seed Andreeva kha kum 2020 champion Swiatek hnu lama tleirawl ni chunga Suzanne Lenglen Cup chawi leh thei hmasaber niin, Pole laka hnehna a chan hnuah Russian hian a tumpui fakin, hmachhawn harsa tak a nih thu leh hun dangah pawh intawn leh zel a duh thu sawi chungin a hmalam hunah final tam zawk a khelh zui zel a beisei thu a sawi a, Paris clay-court tournament meuha a champion chu mumang ang mai a nih thu leh trophy a hum ve ta mai pawh chu a awih loh hial zawk thu a sawi.
Andreeva hian a team chungah lawmthu sawi nghalin, a team-ah hian 2000 French Open runner-up Conchita Martinez chu coach pakhat a ni nghe nghe.
Kum 24-a upa Chwalinska pawhin a ngam loh fakin, straight-sets em ema a tlawm chungchangah a fan-te lakah thupha a chawi zui nghl a; player ropui Mirra a lawmpui thu leh a hmalam hun atana duhsakna sang ber a hlan thu a tarlang tel.