Hunthar in final an lut

Mizoram Rural Bank Bank Pro Volleyball League 2026 a hmawrbawk a hnai a, Thawhleh zan khan mipa semi-final hmasak zawk khelh a ni. Inkhel hmuhnawm takah Hunthar chuan Chhinga Veng Spikers an hneh a, Pro Volleyball League-ah a vawi nga nan final an lut.
Semi-final ah Huntharin bul an tan tha a, point ngaa sang fal chungin set khatna an la. Point 5 ngawta hnufual chungin set hlih bawk mah se Chhinga Veng Spikers an insiamtha thuai. Chhinga Veng hian set hnihnaah hma an hruai fal reng a, point ruk ngawta sang falin set an la let.
Set khat ve ve an lak hnuin inkhel a hmuhnawm leh zual. Chak zawk tur rin thiam a har a, a hmuna entu mipui thawm pawh a tha hle. Chhinga Veng hian League round-a an hneh loh Hunthar lakah chak ngei tumin tan khawh bawk mah se Saipui kal lai ang maia nghet Hunthar an dang zo lo.
Pro Volleyball League-ah vawi thum champion tawh a, champion ngun ber ni mek Hunthar in set an hloh hnuin tan an khawh thar leh a, boruak sangah tawnhriat ngah leh huaisen zawk an nih an lantir. Hunthar hian point ngaa sang fal chungin set thumna an la a, final lut turin set khat lak chiah an mamawh tawh.
Set lina lain thawhchhuah leh tum viau mah se Chhinga Veng an bet tlat a, an khingpuite an chai hleithei meuh tawh lo. An san fal reng hnuin inthlahdah hret mahse Hunthar an inthlahdah rei lova, point ruka sang fal chungin set an lak belh leh a. Chhinga Veng Spikers lakah hian point 25-20, 19-25, 25-20, 25-19 a hnehna changin a vawi nga nan final an lut.
Pro Volleyball League 2026 mipa semi-final hnuhnung zawk hi Nilai zan khan LPS Arena, Falkland-ah khelh chhnzawm a ni a. Champion lai Anastasia Electric Veng leh Khawbel te an intum. Anastasia leh Khawbel te inkhela chak zawk zawk hian final-ah Hunthar an hmachhawn dawn. Hunthar hi an champion leh a nih chuan champion ngun ber an nihna an tizau leh zual ang.
Hunthar leh Chhinga Veng Spikers te hi Inrinni liam ta mai khan League Round-ah an intum a. Chhinga Vengin set khat an lak hmasak hnuin set thum an hloh zawn a, 3-1 in Hunthar lakah an tlawm. Semi-final-ah pawh 3-1 bawkin Hunthar an ngam lo leh a. Hunthar lakah chak an harsat zui zel.
Chhianga Veng nen an inkhelh hmasak aiin Hunthar rinrawl Suryansh Tomar a khel tha zawk a, vawi 37 hlap tlain a hma aiin point 11-in a hmu tam. Point 13 hloh bawk mah se, team chakna hnar ber a ni a, a vawi li nan Kuriz Player of the Match-a thlan a ni. Hunthar tan hian Fabian Lallunghnema’n point 13 hmuin tum ruk a tisual a, Lalbiakmuana’n point hnih paihin point ruk a hlawh chhuak a, Spikers nen an inkhelh hmasak aiin hnuhma an nei tha ve ve.
Lehlam vuak dan kawngah Hunthar an chungnung zawk a, team pahnih inkara danglamna siamtu pawimawh tak a ni. Chhinga Veng Spiers rinrawl Morales Ponce De Leon chuan an inkhelh hmasak aiin hnuhma a nei tha a, point 29 hmuin point 12 a hloh. Morales-a’n hma a sawn laiin Mizo player-te an tla hniam vek thung a. Hunthar hneh tur khawpin an inlan zo lova, uiawm takin an tla.