Christian Eriksen inkhelh laiin buaipuii ngaiin a tlu leh ta

Denmark footballer Christian Eriksen, kum 34, kha kan la hre hlawm em, kum nga liam ta, Euro 2020 (COVID avangin 2021-ah khelh a nih kha) match an khelh laia field chunga lungphu chawl (cardiac arrest) avanga an buai laih laih kha, kan la theihnghilh lo ang tiraw u. Kha Christian Eriksen bawk kha June ni 7 khan Denmark leh Ukraine ten World Cup inbuatsaih nana friendly match an khelh laiin khatiang deuh bawk khan buaipui ngaiin a awm leh ta a, mahse, tun tum erawh 2021 ang em em nasa chu a ni ta lo.
Euro 2020-a a cardiac arrest avang khan implantable cardioverter-defibrillator (ICD) an vuah a, pacemaker chi khat a ni mai e. Heti chung hian a inkhelh chhunzawm leh reng tawh a, Denmark national team-ah pawh a tel a, kumin FIFA World Cup khelh turah pawh Denmark team-ah tel lehin, June ni 7 khan friendly match an khelh laiin a talbuai leh ta a ni.
Mase, a tuk maiah Christian Eriksen chuan thuchhuah nei zuiin, “In zavaiin ka tha tih in lo hre dawn nia, in lamah chhungte bulah ka awm e. Ka ICD avanga shock khan keimah mai bakah kan chhungkua min nghawng nasa a, mahse, 2021 a thil thleng ang em kha chu a ni lo tih in lo hre dawn nia. Ka tha chak viau e,” a ti a, “Keimah leh ka lung (heart) min enkawltu doctor-te chungah ka lawm em em a ni. An thiamna te avangin ka ICD pawh a nih tur ang taka thawkin: ka mamawh huna min vengtu a ni e,” a ti bawk.
June ni 7 khan Denmark leh Ukraine hian Odense-ah friendly match an khel a, minute 65-naah Eriksen hi a âwm dawm chungin field chhungah a tlu ta a. Denmark leh Ukraine player ten game titawpin Eriksen hi an din hual nghal a, mipui lam pawhin “Eriksen, Eriksen” an tirual thup thup bawk. Eriksen hi damdawi lam thiam ten an bawihsawm hnuah field atang hian amahin a kal chhuak thei ve leh ta mai a, game erawh an titawp zui ta tho a ni.