Raltlan lut thar la awm reng

Thla hmasa khan Champhai district-ah Myanmar atangin raltlan an pung leh a, June thlaah pawh lut thar an la awm reng.
Police lam atanga thu dawn danin, raltlan lut thar hi May thla tirah khan an awm leh a, ni tin an lut thar. June-ah pawh lut thar hi an la awm reng a, mahse May ang chu a ni tawh lo. Lut thar an awm loh ni te pawh a awm fo tawh.
Police te’n an chhinchhiah danin, June ni 12 thlengin raltlan lut thar hi Zokhawthar mi 1259 an tling tawh a, Dungtlangah mi 139 vek, Champhai khaw chhunga mi 15 vel, Champhai chhehvelah mi 53 vel an awm.
Champhai district ep Myanmar lamah tun hnaiah mipui an ralmuang lo a, indo a hnaia an hriat avangin an lo insaseng lawk a ni.
Myanmar-ah hian sipai sorkar kut atangin ram engemaw zat chu anmahni dodaltu mipui sipaiin an la a, kuminah sipai sorkar hian lak let tumin thapui a thawh leh a ni. Falam an la tawh a, chumi hnuah Champhai district ep vel hi lak an tum tura ngaih a nih avangin lo insaseng lawk hi an awm a ni.
Tun thlengin an la ralmuang a, inkah a la awm lo. Sorkar sipai lam hian Falam an la pel lo nia hriat a ni a, Falam bul vel khuate pawh mipui sipai thuhnuaiah a la awm.
Inkah a hnai nia ringa raltlan tharte hi, Champhai district bul hnaia mi an ni fur a, dam lo leh natna benvawn nei te, kum upa te an awm nual tih thu dawn a ni.
Champhai district bul vel Myanmar lam hi sipai sorkar kut atanga lain Hualngoram People’s Organisation-in an awp mek. Zo hnahthlak vek an ni a, a tam berin Duhlian tawng an hmang.