SIR digitisation-ah Mizoram che tha

Election Commision of India (ECI) Media & Communication Conference chu Zirtawpni khan India International Institute of Democracy and Election Management New Delhi-ah neih a ni a. Mizoram atangin joint chief electoral officer Ethel Rothangpuii hoin state leh district media nodal officer-te an tel.
India ram state 16 leh UT 3-ah Special Intensive Revision (SIR) kalpui a ni a. Enumeration phase-a awm mek state zingah Mizoram chuan digitisation-ah hma hruaiin 68.05% zawh a ni tawh. A hnaih bertu Manipur chuan 27.11% zo tawhin pathumna Odisha-in 17.58% a zo tawh.
Conference-ah hian ECI director general (Media) Ashish Goyal chuan, India ram puma inthlan felfai kalpui tura media pawimawhna leh mipuiin inthlanah rinna an nghah theihnan media officer-te pawimawhna a sawi a. Director general (IT) Dr Seema Khanna leh ECI Media Division hotute – deputy director Apurva Kumar Singh leh P Pawan bakah assistant director Gouri S-ten presentation an nei a. Awareness campaign neih dan, fake news (thudik lo thehdarh) dolet dan leh pawimawh dang sawiin, thlalak leh video hmangin an zirtir a ni.
An ni bakah hian tunhnaia SIR neih tawhna state – Rajasthan, Kerala, Tamil Nadu leh West Bengal atangin media nodal officer-te hmalak dan ngaihthlak a ni a. SIR an lo kalpui tawh dan sawiin, an tawnhriat leh harsatna an tawh thenkhat atanga mipui zirtirna leh SIR chungchang thehdarh kawnga thil tha an hmuhchhuah, thalaite chawhphurna atan Electoral Literacy Club an hman tangkai dan an sawi a. Booth level officer, booth level agent, polling agent leh counting agent-te pawimawh zia tarlanna lemchan tawi thlirho niin, sawiho a ni bawk.
A kharna inkhawmah chief election commissioner Gyanesh Kumar, election commissioner pahnih – Dr Sukhbir Singh Sandhu leh Dr Vivek Joshi ten an hmanpui a ni.
Mizoram aiawh hian state media nodal officer Lalnunmawii, state social media nodal officer F Lalnisai bakah district media nodal officer leh assistant nodal officer-te an kal a ni.