Trillionaire hmasa ber Elon Musk

Khawvela pahausa ber Elon Musk chuan a company SpaceX share chu mipui lei theih turin a zuar chhuak a, share pakhat man hi dollar 135 atangin dollar 150-ah a invawrh nghal a, share hi hralh a kal cher cher hle a, SpaceX hlutna leh Tesla hlutna te nena belhkhawmin Elon Musk hausakna hi dollar trillion 1.1 a kai ta niin Forbes chuan an tarlang a, khawvel mihring zinga trillionaire hmasa berah an puang ta a ni.
Trillion chu a tam tawh lutuk a keini chhiar sen loh kan tih ang tak tak hi a ni tawh a, trillion khat chu 10,00,00,00,00,000 a ni a, 0 ringawt pawh 12 a awm tawh a, tluklehdingawn (billion) hlir 10,000 tihna a ni.
Zirtawpni kalta khan Elon Musk hian a rocket company SpaceX share chu hralh chhuakin, reilote chhungin share pakhat hlutna ni 11%-in a pung a, share pakhat man dollar 135 atangin dollar 150 a kai a, a hnu deuhah dollar 172 a kai leh a, tichuan SpaceX market value chu dollar trillion 2.18 a kai ta a ni. SpaceX hlutna hi dollar trillion 2.18 kai mah se a vaiin Elon Musk a chanpual a ni thei bik lo a, SpaceX-a a chanpual bakah a company dang Tesla, neurotechnology company Neuralink leh tunnel firm The Boring Company leh X (Twitter tih thin kha) a a chanpual te nen Elon Musk hlutna hi Zirtawpni zan kha dollar trillion 1.1 a kai ta a ni.
Elon Musk hian 2021 khan Amazon neitupa Jeff Bezos lehpelin, khawvela pahausa ber a ni a, hemi tum hian Tesla share hlutna a pung nasa hle a, hetihlaia Musk-a hlutna hi dollar tluklehdingawn 185 a tling. Heta tang hian hausak lama tuman an lehpel thei ta lova, ni hnih khat han lehpel zuai tute awm ve leh zauh thin mah se tunah chuan tuma el phak rual a ni ta rih lo.
Elon Musk chuan SpaceX share a hralh chhuahna chhan hi Sikeisen (Mars) a mihring kal theih tuma hma an lakna atan vanthengrenga satellite leh data centre dahna tur sum an mamawh vang niin a sawi a, Mars-ah hian astronaut te chauh kaltir an tum loh thu sawiin Musk chuan, “Astronaut te chauh kha lo mitthla suh u, nangni pawh khan kan huam tir vek che u. Tupawh ni la, hei hi i lo hmu a nih chuan, SpaceX hian thla (moon)-a te kaltir theih che a tum a, chumi piah lam Mars thleng pawhin,” a ti.