DPAR chhuhsak thuin titi luah

June ni 18-ah political & cabinet department-in notification an chhuah a, chief minister-in DPAR a chan tawh tur chu an ziak. Zan lamah he notification hi a darh a, MP thlan thar chungchang pawh a lan hneh hle.
Sorkar hnathawkte enkawla an awmna tur siamtu DPAR (Department of Personnel & Administrative Reforms) hi minister K Sapdanga chan a ni thin a, tourism department director (additional charge) atanga pensioner rawih tumnaah, dan a ni lo tia an sawina e-file a darh hnuah a changtu minister kut atanga chief minister-in a la ta a ni.
A hma ni-ah khan social media lamah chief minister-in DPAR a lak tur thu hi a darh tawh a, hei hi ZPM rorelna sanga an thurel tiin a darh.
June ni 16-ah chief minister conference hall-ah ZPM Political Affairs Committee (PAC) an thu a, DPAR hi chief minister-in la se tiin an rel tiin thu a darh. Mahse minister chanpual siksawi hi party thu a ni lo a, PAC rel tur a nih loh avangin awih lo an awm. Mahse an lo rel ngei a, PAC thu anga hetia minister department chan siksawi a ni hian mak tih a hlawh hle.
Thu dawn danin, ZPM PAC thutkhawmah pawh hian PAC thu a nih loh thu leh an rel tur a nih loh thu te, minister department chan tihdanglam chu chief minister thu a nih thu te sawi an awm a, a hmain minister thenkhat, K Sapdanga, Lalrinpuii, Dr Vanlalthlana te department chan pawh mi dang kuta dah a lo ni tawh a, PAC-in a rel lo tia sawi te, hetianga kan rel a nih chuan Pu Duha leh Pu Sapa pawl tih titi pawh a lian zual ang tia sawi te pawh an awm.
PAC-ah hian chairman chu chief minister a ni a, secretary chu MP (Rajya Sabha) thar K Laltluangkima a ni. An party elected OB-te, consultant 10 chuang te, PAC member atana thlan mi 10 leh president mi ruatte an awm. President mi ruat hi mi panga an awm mek nia hriat a ni a, DPAR minister hlui ni ta K Sapdanga chu PAC-ah hian a tel lo.
PAC rel tur a ni lo tia hnial an awm chungin chief minister kaihhruai PAC chuan chief minister-in PAC hi la se tiin an rel ta a, sawi zui a hlawh hle. Chief minister-in DPAR hi chan a duh a, ama thuin a ti ngam si lo a ni ang tih ngaihdan a lian.
Political & cabinet department-in notificiation an chhuah hi June ni 18 zan lamah a darh a, PAC-in an thurel, chief minister an hriattirna lehkha a darh ve nghal chiah bawk. A hma atang tawhin PAC-in DAPR kalphung siamthat chungchangah a changtu minister hnenah rawtna an lo thlen tawh a, mahse tihhlawhtlin a ni lo tiin chipchiar takin an ziak a, June ni 16-a an thurel chu paragraph tawp berah tawi te an ziak chauh. PAC chairman kha chief minister Lalduhoma a ni a, a hova an thurel chu ama hnenah bawk ziakin an thlen tlat a, chu chu a darh zui tlat bawk. A hmain zirlai pawlte’n DPAR secretary thlak tura chief minister hnena ziaka an thlen chu a darh tlat tawh bawk.
Tun hnaia pensioner rawih nawn chungchang a ri thar leh a, ZPM an sorkar hmaa ZPM chief minister-in department chan a nei ve lo ang tia tuna chief minister ni mekin a sawina video clip a darh thar leh bawk. MP (Rajya Sabha) atana an party candidate tur thlan chungchangin khel a hlawh zual phah bawk. DPAR changtu hlui K Sapdanga chu Lunglei lamah a zin a, an party PAC thurel pawh hi a zinna atangin a lo hre turah ngaih a ni.