Hnathawk tura hruai kum tling lo hruaitute an man
Maharashtra-a Spa-a thawk tura hruai nia sawi, Kolasib district-a hmeichhe tleirawl pakhat chu amah hruaitu Mizo pahnih nen West Bengal-ah man an ni a. Tleirawl hi hun engemaw chen West Bengla-a home pakhata a awm hnu ah Ningani khan Kolasib District Child Protection Unit kuta hlan a ni.
Thudawn danin, kumin February 12 khan he tleirawl hi puitling pahnih, Kolasib district-a hmeichhe pakhat leh Serchhip district-a cheng a thianpa chuan Mumbai-ah Spa-a thawk turin an hruai thla a, Sairang atangin relin an chhuk. February 14 khan West Bengal Police chuan Nadia district huamchhunga rel an lo enfiahnaah hmeichhe naupang leh amah hruaitute hi rinhlelh thilah an man a, thu an zawhfiah hnu ah ‘human trafficking’ thubuai siamsak zui an ni.
An sawi danin tleirawl hian thla khatah Rs. 12000 a hlawh thei dawn a, a kalna senso leh kawng laka ei leh in zawng zawng an tum sak vek a ni. West Bengal Police-in an man a hruaitute hi an hreng zui a, tleirawl hi Nadia district-ah ‘Home for Girls’ ah hun engemaw chen dah a ni.
Hemi chhung hian Nadia District Child Welfare Committee chuan Kolasib DCPU chu be pawpin, protection officer (Institutional Care) C Lalzawmdiki chuan tleirawl chenna khua hi a tlawh a, Social Investigation Report (SIR) a nei. SIR report hi Nadia District CWC pek an ni a. Chumi kalzelah chuan June 16 khan Child Welfare officer Puja Nandi kaihhruaiin an dah lailawkna home-a thawktu leh police officer pakhatin Mizoram an rawn panpui a, June 17 zan khan Kolasib DCPU atangin thawktuten an lo hmuak.
June 18 khan DCPU office Kolasib-ah tleirawl hi an inhlan a, hetah hian hmeichhe naupang pa pawh tel mah se, dan anga kalpui a ngaih avangin a chhungte kutah hlan nghal a ni loa, home-a enkawl rih a ni ang.
Kumin May thla tir khan Mizoram atanga kal hmeichhia tleirawl 5 chu Uttarakhand-ah Spa-a thawk tura hruai niin, an taksa inzawrh luih tir an ni tih sawi a lo ni tawh a, police-ten an chhuizui hnuah mi 6 man niin tleirawlte hi chhanchhuah an ni. Hetah hian a bultumtu zingah Kolasib mi a tel nia sawi a ni.