Tuialhthei khaihlak lo

Khawvelin tuialhthei lama sumdawnnaah harsatna a tawk mek a, ram hrang hrangin inrenchem tul an ti. Mizoram pawhin harsatna a tawk a, mahse a nasa lo. Lei tur a awm reng a, inchan loh pawh a awm lo.
May thla laihawl atang khan Mizoram pawhin harsatna a tawk a, mahse petrol leh diesel a vang lo; a man a pung a, lei theih zat bituk a ni bawk.
June thla chawhnu lamah pawh tuialhthei hi a vang lo a, lei tur a awm reng. Chutih laiin inkhuahkhirhna chu a la awm reng a, harsatna thleng mah se khaihlak a la awm lo tih thu dawn a ni.
India sorkar hnuaia ministry of petroleum & natural gas-in inkhuahkhirhna an siam a, mi pakhat tan ni khatah diesel Rs 50000 man bak pek loh tur, petrol pawh ni khatah Rs 5000 man bak pek loh tur tih a ni a, June ni 11-ah thu thar a awm – diesel hi mi pakhat tan ni khatah litre 200 bak pek loh tur tih a ni. Chung chu Mizoramah pawh zawm a ni a, filling station hrang hrangte a huam vek a ni.
Filling station (petrol pump) hrang hrang enkawltute’n lei tur an neih reng thu leh chatlak lai a awm loh thu an sawi a, amaherawhchu, Silchar bul Mainarbond-a tuialhthei an lakna IOC depot-ah nghah rei a ngai tih, ni hnih ni thum nghah a ngai thin tih an sawi.
USA leh Israel tang dunin Iran an do a, he indo hian khawvel hmun hrang hrangah tuialhthei, aluminium leh fertilizer lama sumdawnna a nghawng a ni. India ram pawh a nghawng a, India sorkarin tuialhthei lei leh hralh kawngah inkhuahkhirhna a siam a, inremchen thu pawh an aupui bawk. Mizoram chu he harsatna hian a nghawng na rih lo.
Mizoram a nghawng dan ber chu, tuialhthei man tihpun hi a ni awm e; May ni 19, ni 23 leh ni 2-ahte khan petrol, diesel leh XP mante tihpun a ni.