Germany in last 32 an lut

World Cup 2026 khelh mekah Inrinni zan khan inkhel hmuhnawm tak a awm a, Group E leader nih inchuhna inkhelah Germany in Ivory Coast an lehthal. 2-1 a Ivory Coast hnehtu Germany hian group champion ni chungin last 32 an lut. Group E a inkhel dangah Curacao in Ecuador lakah tlawm an pumpelh a, World Cup-a an point hmasa ber an hlawhchhuak.
Germany 2-1 Ivory Cost
BMO Field, Toronto-ah Europe team lian Germany leh African team lian Ivory Coast te an inhnehtawk hle a, inkhel hmuhnawm tak an pholang. Chak tura rinkai zawk ni phak lo Ivory Coast in goal an thun hmasa a, minute 30-naah Franck Kessié goal thun hmangin hma an hruai.
An khingpuite laka an si phurh an sut theih loh reng hnuin Germany manager Julian Nagelsmann chuan player a thlak kual a, pathum ngwat lachhuakin pathum dang a luh thar tir. Nagelsmann hian hming langsar Jamal Musiala lachhuakin tunhnaia khel tha tak Deniz Undav a luhtir. Undav hian bul tan tlak a nihzia a lantir a, mualchhung a luh atanga minute 8-na lekah goal thunin an si phurh a sut nghal.
An si phurh an sut vangin Germany an phur thar a, goal thun belh ngei tumin tan an khawh. Ivory Coast pawhin hmahruai nawn leh a chak ngei tumin tan an khawh ve bawk a, an innawr tawn nasa in, inkhel a hmuhnawm hle. Inkhel hmuhnawm takah goal a luh belh theih loh reng hnuin Germany an che fuh nawn leh a, a tawp an khar tha ta nge nge. Bench atanga lut Undav chuan minute 90’+4-naah hma an hruai letna goal a thun. Super sub Undav goal hnih thun hmangin Germany in hnehna an chang a, point thum hlu tak an hmu a, The Elephants laka point thum an hmuh hmangin Group champion ni chungin last 32 an lut chiang zui nghal.
Ivory Coast laka goal hnih thuntu Deniz Undav khan tunhnaiah a khel tha hle. Tunhnaia Germany tan a khelh hnuhnung vawi 10-ah goal 7 ngawt a thun a, assist vawi 4 lai a nei bawk. Ram tan a chetthat bakah season liam ta khan VfB Stuttgart tan goal 25 lai a thun tling bawk. World Cup 2026 a Curacao an sawp tum khan bench atanga lutin goal a lo thun tawh a, Ivory Cost lakah pawh bul a tan phak mai a rinawm hle. Bul tan phak ta lo mah se bench atanga lutin goal hnih a thun a, an ram a chakpui. Group champion an ni chiang ta bawk a, Ecuador lakah bul a tan tawh ngei a rinawm.
Group E a inkhel danah Ecuador leh Curacao te goal awm lovin an inhnehtawk a, World Cup hmel thar Curacao in point khat an hmu ve nawlh.
Group E-ah hian Germany in point 6 an hmu tawh a, Ivory Coast in point 3 hmuin Ecuador leh Curacao ten point 1 ve ve an hmu. Germany tih loh team dang pathum zingah Ivory Coast chiahin point 6 an hmu thei a. Elephants hi Germay lakah head to head-a an chhiat zawk vangin Germany chu group champion an ni chiang tawh. Ivory Coast hian tbale mawngphaha awm Curacao an hmachhawn leh dawn a, harsa lo taka hnehna changin last 32 an luh ngei a rinawm.
Canada hian BC Place-a an khingpui Qatar lakah bul an tan tha viau a, goal pawh an thun hma hle. Inkhel tan atanga minute 16-na lekah Cyle Larin chuan hmahruaina goal a thun. Hmahruaina goal an thun hnuin Canada tana goal thun hnem ber Jonathan David chuan minute 29-naah an goal hnihna a thun a, an hmahruaina a tizau.
Si hnih an phurh hnuin Qatar an che chhe chhunzawm a, minute 33-naah Homam Ahmed-ah hnawhchhuah a ni. Tam zawk an nih hnuin Canada an hlauhawm leh zual a, Jonathan David chuan minute 45’+3na leh hun tawp dawn hnaih minute 90’+2-naah goal a thun zui leh a, World Cup-ah ngei hattrick a siam.
Minute 53-naah Assim Madibo hnawhchhuah a nih hnuin Canada tan chet a awlsam phah viau a, Nathan Saliba-a’n goal a thun bakah Qatar player Mohamed Manai chuan an lamah a ti-goal bawk a, Canada in 6-0 ngawtin hnehna an chang a, phu takin point 3 an hmu.
6-0 ngawta Qatar an sawp vangin Canada hian last 32 an hnaih viau tawh. Point li an hmuh tawh bakah goal difference-ah +6 ngawt a ni bawk a, last 32 lut chiang tluk an ni.
Switzerland 4-1 Bosnia
An hneh ngei tura ngaih Qatar lakah mak tak maia chak zo lo Switzerland an insiamtha a, Zirtawp zinga an khingpui Bosnia-Herzegovina chu 4-1 ngawtin an sawp a, last 32 an hnaih.
Europe ram pahnihte hi SoFi Stadium ah an inhnehtawk viau a, goal pawh a lut har hle. Hun rei tak chhun goal lut a awm theih loh hnuin Switzerland coach Murat Yakin chuan fuh zetin player a thlak. Bench atanga lut Johan Manzambi chuan minute 74-naah hmahruaina goal a thun a, hei hian game a thlak danglam dawrh. Goal an chhuah hnuin Bosnia an talbuai zui a, minute 80-naah Tarik Muharemovic hnawhchhuah a ni.
Tam zawk an nih hnuin Switzerland an khel tha zual sauh a, goal pawh an thun belh leh thuai. Minute 84-naah Rubén Vargas-a’n an goal hnihna a thun hnuin goal hmahruai thuntu Johan Manzambi chuan minute 90-naah an goal thumna a thun zui leh. Si thum ngawt an phurh hnuin Bosnia in goal an thun ve teh mial a, Ermin Mahmic chuan minute 90+3-ah goal thunin an si phurh a sut then.
Goal an thun vangin phur thar bawk mah se Bosnia an phur rei lova, an chesual nawn lehin penalty an chawi. He penalty hi Arsenal captain hlui Granit Xhaka chuan minute 90’+7-naah an goal lina thunin an chakna a nemnghet a, point thum an hmu zui ta a ni.
An hmabak
Group B-ah hian Canada leh Switzerland ten point li ve ve an hmu a, last 32 lut turin an dinhmun a tha viau tawh. Canada leh Switzerland hi an inhmachhawn zui leh dawn a, an inhnehtawk a nih chuan point 5 ve ve hmuin last 32 an lut ang. An inhnehtawk hlauh a nih chuan Canada chu group champion an ni tho bawk ang. An match hnuhnung berah tlawm ve ve pawh ni se point li an nei tawh a, tlang turin a dinhmun a tha viau tho thung. Chuan, point 1 ve ve hmu mek Bosnia leh Qatar an intum ang a, a chak zawk zawkin last 32 luh theihna chan an nei ang.