Vending zone zirchiang tur Study Team kan din – Aizawl mayor

Aizawl Municipal huamchhunga streen vendor ho leh vending zone chungchang zirchiang turin Study Team an din a, thutna hmun sawn leh thutna nei lote chungchang pawh an ngaihtuah tel tih Aizawl mayor H Lalremtluanga chuan a sawi.
UD&PA department buatsaih ‘SVANidhi Mahotsav’ (Khawlaia thil zuarte puala Kut) chu Thawhlehni khan Aizawl Municipal huamchhung amite tan neih a ni a. Hmanpuitu Aizawl mayor chuan, mahni sum hmang ngawta sumdawn a harsa a, PM SVANidhi Scheme hnuaia loan hmanga sumdawnna an kalpui thei chu lawmawm a tih thu a sawi. An loan lak an rulh that chuan an CIBIL score a tha anga, loan tha zawk dil kawngah pawh a pui thei dawn tih a sawi a ni.
AMC sawkar thar hnuaiah vendor-te leh vending zone zirchiang turin Study Team an din a, vending registration pek chhuah chungchangah hmasawnna tur an ngaihtuah mek a, thutna hmun sawn leh thutna hmun tur neilote chungchangah pawh ngaihtuahna sen mek a ni tih a sawi. Thutna awm sa cheithat kawngah leh mipui tana dawr nuam theih tur zawka siam kawngah hma lak zel an tum tih a sawi bawk.
PM SVANidhi state mission director, UD&PA director Jacob Lalawmpuia chuan PM SVANidhi Scheme hi Covid 19 vanga khawlaia thil zuarten an eizawnnaa harsatna an tawh phuhrukna, loan leh hamthatna dang an dawn theihna scheme a ni tih a sawi a. Mizoramah PM SVANidhi beneficiaries 4459 an awm tawh a, he scheme hi AMC huamchhungah kalpui mek niin, Lunglei leh Mizoram hmun danga la kalpui zel tur a ni tih a sawi.
Street vendor-te chu ram economy siamtute zing ami an ni, tiin, AMC sawkar chu UD&PA nen thawhhona tha an neih ngei a beisei tih a sawi bawk.
Kutah hian PM SVANidhi credit card sem a ni a, loan vawi hnihna thleng rul zo tawh tana dil theih niin, mi 42-in an dil tawh. PM SVANidhi scheme kaltlanga loan rul tha leh digital payment ti tam zual mi pali hnenah certificate leh sumfai hlan an ni.