Ruihhlo donaa tanho dan tur sawi

Mizorama ruihhlo hluar zel tur dan beh kawnga kil hrang hrang atanga tanho dan tur chu Thawhlehni khan Aizawlah sawiho a ni a. Hemi kaihhnawiha sawrkar department, tlawmngai pawl, kohhran aiawh an tel.
Hmanpuitu Excise & Narcotics minister Lalnghinglova Hmar chuan, state sawrkar leh pawl hrang hrangin nasa takin ruihhlo do lamah hma an lak rualin, tun aia nasa lehzuala tan lak a ngai tih a sawi a. Mizoram chu a zim bakah mihring cheng pawh kan tam loh avangin kan tanrual phawt chuan ruihhlo do kawngah beisei tur a awm tih a sawi.
Excise& Narcotics secretary C Lalruaia pawhin, Mizoramin ruihhlo do kawnga kan mamawh leh kalphung thar duan a, thiamna sang zawk hmang tangkaia inherrem zel a pawimawh tih a sawi a. Social Welfare director Sushil Singh chuan seminar hi International Day Against Drug Abuse and Illicit Trafficking denchhena buatsaih a ni tih a sawi a. Mizoramah sawrkar, kohhran leh khawtlang thawhhona a that avangin lawmawm a tih thu sawiin, damdawi hmansual hi harsatna lian tak a ni a, inzirtir kawngah pawh nasa taka hma lak tul a ni tih a sawi.
Seminar-ah hian mithiamten thupui thlan bik hmangin an sawizau a. Excise & Narcotics joint commissioner Peter Zohmingthanga’n ‘Emerging Trends in Drug Abuse: Perspectives on Supply Reduction’; Synod Hospital director Dr RL Sanghluna’n ‘Medical aspects of addiction and the current challenges in care & treatment’; Directorate of Social Welfare MSD&RB Vanlalhruaii’n ‘Drug Demand Reduction: Strategies for Addresing Emerging Challenges’ tih thupui a sawi a; Mizoram Drug Users Forumpresident Lalremruata’n ‘Community perspective on emerging trends and challenges’ tih thupui a sawi a ni.